ALDYŃNAN ShYǴADY...

«Myń bir túnniń» áıgili keıpkeri, ádiletti ámirshi Harýn Rashıt saraı baǵynda qulpyryp ósken qyzyl raýshandy qatty unatqan eken. Gúldiń túsi de, japyraǵy da sondaı kóz tartatyn. Bir kúni ol:

– Myna gúldi kórgende, bir demalyp qalamyn. Sen osy gúlge muqııat qara, sýaryp júr, japyraqtary solmasyn. Basyńmen jaýap beresiń! – dep baǵbanǵa buıyrady.

Baǵban ámirshiniń aıtqanyn buljytpaı oryndap júredi. Biraq kúnderdiń bir kúninde gúlge kelip qonǵan bulbul qusty kórgende baǵbannyń júregi sýyldap, kóńilinen maza qashady. Erke qus ushyp-qonyp, gúldiń japyraǵyn túsirip ketedi.

– O, patsham! Anaý bulbul, – dep solyǵyn áreń basady baǵban. – Gúldiń japyraǵynan túk qaldyrmady. Ne isteımiz endi, ne isteımiz?!

Kópti kórgen Harýn Rashıt sabyrlyq saqtap:

– Abyrjyma, bulbuldyń istegeni aldynan shyǵady! – deıdi. Kóńili jaılanǵan baǵban baqqa qaıtyp oralady. Aram shópterdi julyp otyrǵanda, álgi bulbuldy bir jylannyń ustap alyp, ıreleńdep bara jatqanyn kóredi. Dereý ámirshisine óz kózimen kórgenin aıtyp keledi:

– O, patsham! Gúldiń japyraǵyn julǵan qusty bir jylan ustap aldy.

– Qapa bolma, jylannyń istegeni de aldynan shyǵady! – deıdi halıfa.

Baǵban qaıtadan baqqa barady. Jerge eńkeıe bergende, álgi qus ustaǵan jylandy kórip, shoshyp ketedi de, qolyndaǵy kúregimen bir uryp óltiredi.

Sóıtip, ámirshisine qaıta kelip:

– O, patsham! – deıdi baǵban. – Qusty ustaǵan jylandy kúrekpen uryp óltirdim.

– Aıtarǵa sóz joq, seniń de istegeniń aldyńnan shyǵady, – deıdi halıfa.

Halıfanyń degeni bolady. Bir kúni baǵbannyń baqtalasy kelip, ekeýi shaıqasyp qalady. Baǵban onyń basyn jaryp qoıyp, sotqa tartylady.

– Zyndanǵa laqtyryńdar! – deıdi halıfa.

Ábden qaljyrap bitken baǵban burylyp ámirshisine qarap:

– O, patsham! Bulbul qustyń istegeni aldynan shyǵady dep edińiz, aqyry ony jylan jutty.

Jylannyń da munysy aldynan shyǵady dedińiz, ony men óltirdim. Maǵan da jaza kesildi. Al siz she? Sizdiń aldyńyzdan eshteńe shyqpaı ma? Eger aıtqanyńyz ras bolsa, shyǵady ǵoı, – deıdi.

– Sonda ne degiń keledi? – dep suraıdy ámirshi.

– Meni keshirseńiz, sizdi de basqalar keshiretin bolady.

– Baǵbandy bosatyńdar! – dep buıyrady halıfa.

– Baýdaǵy jumysyn jalǵastyra bersin!

Sol bir sátte ýázirler:

– Jazasyn bermeseńiz, aıyby sol kúıinde qala beredi, – desedi.

– Jo-joq, – deıdi Harýn Rashıt.

– Ár adamnyń istegeni aldynan shyǵady! Bu dúnıede kórmese de, o dúnıede eselep tartady.

Al uıqyly-oıaý júrgen ǵapyldar ony túsine bermeıdi. Allanyń ádildigi solaı!

Kisiniń jasaǵan qaıyry da bosqa ketpeıdi...

"Bir qaıyry bar dúnıe" kitabynan