ALLA BIZGE JETKILIKTI!
Isti Allaǵa tapsyrý, Oǵan táýekel etý, ýádesine sený, bergenine rızashylyq tanytý, Ol týraly jaqsy oıda bolyp, kómegin kútý – ımannyń jemisteriniń biri jáne naǵyz musylmandyq sıpat. Istiń sońy jaqsy bolatynyna sengen musylman ár isinde Rabbyna arqa súıep, árdaıym kómegine, qamqorlyǵyna, qoldaýyna ıe bolyp otyrady.
Ibrahım paıǵambar otqa tastalǵan kezinde perishte kelip: «Kómektesýge ruqsat et» deıdi.
Sonda Ibrahım paıǵambar Jaratýshy Iesine arqa súıep:
«Alla bizge jetedi, Ol netken jaqsy qamqorshy» degen edi.
Onyń osy táýekeline dán rıza bolǵan Alla Taǵala tándi jandyrar otty oǵan janyna jaıly etip salqyndatqan joq pa edi? Ibrahım da dúnıedegi eń jaqsy kúnderi sol otta ótkizgen qyryq kúnim dep, Alla ol jerdi jannattaı jaınatyp qoıǵanyn aıtqan.
Adam balasy jalǵyz ózi aınalasynda oryn alyp jatqan jaıttarǵa tótep bere almaıdy, óıtkeni ol álsiz bolyp jaratylǵan. Tek Rabbysyna táýekel etip, senim artsa jáne isin Oǵan tapsyrsa ǵana kúsh-qýaty artpaq.
Keri jaǵdaıda beıshara, dármensiz pende basyna qaıǵy tússe, odan qutyla almaı ábigerge salynady. Quranda da: «Eger múmin bolsańdar, Allaǵa ǵana táýekel etińder» («Máıdá» súresi, 23-aıat),- dep aıtylǵan.
Paıǵambarymyz da (s.ǵ.s.) osy turǵyda árdaıym bylaı dep duǵa etetin:
«Ýa, Alla Taǵalam! Saǵan ǵana boısundym. Bir Ózińe ıman keltirdim. Saǵan ǵana táýekel ettim jáne kúnálarym úshin táýbe etip, bir Ózińe qaraı bet burdym. Seniń qoldaýyńmen (dushpandarǵa qarsy) kúrestim.
Ýa, Alla Taǵalam! Senen basqa Táńir joq. Týra joldan taıdyryp jiberýińnen qorqyp, Ulylyǵyńa sıynamyn. Sen ólmeıtin máńgi Tirisiń. Al jyndar men adamdar ólim quryǵynan qutyla almaıdy».
Qaıǵydan qutylýdyń bir joly − «Asa qudiretti Allaǵa táýekel ettim! Alla bizge jetkilikti, Ol netken jaqsy qamqorshy» dep duǵa etýi kerek.
Tipti malyń azaıyp, qaryzyń basyńnan asyp ketse de:
«Alla bizge jetkilikti, Ol netken jaqsy qamqorshy» dep duǵa qyl.
Eger dushpannan qorqyp, boıyńdy úreı bılese:
«Alla bizge jetkilikti, Ol netken jaqsy qamqorshy» dep óz-ózińe basý aıt. Sebebi Jaratqan Jappar ıe bylaı dep súıinshileıdi: «Rabbyń sen úshin jetekshilik pen kómekshilikte jetip asady!» («Furqan» súresi, 31-aıat).
Eger tiriltýshi de, jan alýshy da, rızyq berýshi de bir Alla bolsa, onda nelikten adamdardan úreılenesiń? Adamdarǵa senim artyp súıenip, rızalyqtaryn izdegenderdiń, solarǵa jaqyndaýshylardyń, olardy kóp maqtaýshylardyń jáne zııandyqtarynan qorqatyndardyń qaıǵy men ýaıymǵa salynǵanyn talaı kóremiz. Mine, bul ımannyń álsizdiginen.
