ALLA JOLYNDAǴY ÁÝLIELERDIŃ NURLY SÓZDERINEN
Hazireti Ábý Iazıd ál-Bıstamı q.s. bylaı deıdi:
+. «Allanyń sondaı quldary bar: kim olarǵa bir ret qana nazar salsa, sol adam máńgi baqytqa jetedi, odan keıin eshqashan baqytsyz bolmaıdy».
+. «Dúnıe – óz adamdary úshin aldaý ústine aldaýdy jalǵastyryp jatyr.
Aqyret – óz adamdary úshin qýanysh ústine qýanysh syılap jatyr.
Allany súıý – Ony súıgender úshin nur ústine nur tógilip jatyr».
+. «Otyz jyl boıy Allany eske alǵym kelgen saıyn, Ony eske alýǵa til tıgizerden buryn aýzyma sý alyp, tilimdi jýatynmyn – Allany ulyqtaǵanymnan».
+. Bir adam odan: «Allanyń uly esimi (Ismý Aǵzam) qaısy?» – dep surady. Ol bylaı dedi: «Onyń belgili bir shegi joq. Ol – júregińdi Onyń jalǵyzdyǵyna tolyq bosatý. Eger sondaı kúıde bolsań, qaı esimdi qalasań da sonymen jalbaryn – sol esimmen shyǵystan batysqa deıin jetesiń».
+. «Allanyń sondaı erekshe quldary bar: eger olardy jánnatta Allany kórýden bir sátke qalqalasa, olar jánnattan shyǵarýdy surap jalbarynady – tozaqtaǵylardyń tozaqtan shyǵýdy suraǵanyndaı».
+. «Eger maǵan shapaǵat etýge ruqsat berilse, eń aldymen maǵan zııan tıgizip, japa kórsetkenderge shapaǵat eter edim, sodan keıin ǵana maǵan jaqsylyq jasap, qurmet kórsetkenderge».
+. Odan súnnet pen paryz týraly suraldy.
Ol: «Súnnet – dúnıeni tárk etý, al paryz – Maýlamen (Allamen) birge bolý. Óıtkeni barlyq súnnet dúnıeden bas tartýǵa nusqaıdy, al Qurannyń barlyǵy Allamen suhbattas bolýǵa shaqyrady. Kim súnnet pen paryzdy úırense, onyń ımany kemeldenedi», – dedi.
+. «Arıftyń (Allany tanyǵan áýlıe) eń tómengi dárejesi – sý betimen júrý, aýada ushý.
Eń joǵarysy – eki dúnıeden de ótip, Alladan basqa esh nársege burylmaý».
