BATALY ER ARYMAS

Uly júzdiń arasynda Qaıdar degen jigitti el bılemekke belgileıdi. Sonda kópshiliktiń ishinde buryn jol kórgenderi aıtypty:

— Sen Arǵyn Alshaǵyr bıden bata al, «Bataly er arymas» degen. Onsyz bılikke aıtqan sózińde pátýa bolmaıdy,— deıdi. Sodan keıin Qaıdar Alshaǵyrǵa kelip sá- lemdesedi. Alshaǵyr: «Shyraǵym jolyń bolsyn, qandaı buıymtaıyń bar edi?» — depti. Qaıdar:  «Bir-eki aýyz suraıtyn suraǵym bar edi»,— deıdi.

— Birinshi — týmaı jatyp ákem óldi, týǵan soń úsh aıdan soń sheshem óldi. Er jetip mal taptym, tapqanym quralmaıdy, uraǵa jyǵylady, ury alady, óle beredi. Jasymda jetim qylyp zarlatty, ósken soń kedeı qylyp qaqsatty. Men qudaıdyń nesin aldym? Osyǵan aıtar aqylyńyz bar ma? — depti.

Alshaǵyr aıtypty:

— Balam, sen jetim emessiń ǵoı, dúnıede úsh jetim bar. Basshysy kelispese el jetim, uqpasqa aıtqan sóz jetim, jańbyrsyz jer jetim. Ol jetimdikterge sen jatpaısyń.

 

                                   Baq-dáýlet keler bolsa,

                                   Otyńnyń basy uıym bolar,

                                   Úıiń kúnde meıman jıyn bolar.

                                   Kedeılik keler bolsa,

                                   Buta túbi úıiń bolar.

                                   Kedeılikke qarsy tur,

                                   Keletuǵyn kórinbeı.

                                   Bir minse ıyǵyńnan túspeıdi,

                                   Qaınatqan qara jelimdeı.

                                   Qaraý bolma ashyq bol

                                   Sarańdyqqa berilmeı.

                                   Mal tap, alysqa ket,

                                   Jalqaýlyqqa jeńilmeı.

                                   Mal arystannyń aýzynda,

                                   Túrikmenniń tórinde,

                                   Tabarsyń ony qaırattansań erinbeı.

                                   Baq-dáýlet kelýine men kepil,

                                   Ar-uıatyńdy tekpeı júrseń, elirmeı.

                                   Atyń Qaıdar eken, aıdarsyń,

                                   Toptap maldy baılarsyń.

                                   Tasymaı júr, tasyǵan tógiler. —  

                                   Aqylmen júrseń, rýly eldi jaılarsyń,—

dep aqylyn aıtyp, batasyn beripti.