BAIDALY MEN MAITOLYQ

Aǵaıyndy Toraıǵyr men Shoń ákesi ólgennen keıin arazdasyp, kergisiz bolypty. Sonda Túsip degenniń shaqyrýymen Baıdaly qart tatýlastyrýǵa keledi.

Baıdaly Shońnyń aǵasy Toraıǵyrǵa bylaı deıdi:

—     Toraıǵyr men Shońbysyń maqtap júrgen,
Bar bilgeniń osy ma saqtap júrgen?
Arazdasyp ekeýiń aýlaq ketseń,
Quzǵyn qarǵa jemeı me jaqtap júrgen!

Sonda Toraıǵyr «aıtqanyńdy qabyl aldym» deıdi. Baıdaly «áýeli aǵa baýyrdan bolady, ini tastan bolady, inińniń barda aıaǵyna jyǵyl» deıdi. Toraıǵyr «maqul» deıdi. Biraq Baıdaly az oılanyp: «Jurtqa bul jaman úlgi bolar»,— dep, inisi Shońǵa bylaı deıdi.

—     Qaraǵaı boıy qar jaýsa,        
Jutamaıdy saýysqan.
Qandy qalpaq kıse de,
Shydamaıdy týysqan.
Ońǵandyqtyń belgisi  
Ózi urysyp, tabysqan.
Ońbaǵannyń belgisi  
Ótken isti qýysqan.

Sonda inisi Shoń aǵasy Toraıǵyrdyń el turmaı ertemen úıine kelip, túndigin ashyp, sháýgimin asyp jatqanda, Toraıǵyr tósekten basyn kóterip alyp, et júregi ezilip, inisi Shońǵa:

—     Jaqsy kisi aqylymen táýir bolady,
Minezi qorǵasyndaı aýyr bolady,
Qulaǵy ósekti estimeıtin saýyr bolady,
Kedeıdiń jalǵyz kerindeı
Quıryǵy sholaq, arqasy jaýyr bolady.

Osy minezdiń sende bireýi de joq, bireýdiń tili tıip qalsa, qoly tıip, súıegimizge tańba bolyp qala ma dep ótirik araz bolyp júr edim degen eken.