Bekpenbetova Sandýǵash Serikqyzy,

1997 jyly Qyzylorda qalasy, Shıeli aýdanynda dúnıege kelgen. Almaty qalasyndaǵy Ortalyq meshit shákirti, Ál-Farabı atyndaǵy QazUÝ-dyń túlegi, Abaı atyndaǵy QazUPÝ-dyń 1-kýrs magıstranty.

Paıǵambarlar sultany
Bıssmılláhır rohmánır rohım!

Zaman tynysh, adam tynysh bul kúnde,
Shúkirim bar árbir sáttik kúlkimde.
Qabyl bolyp Allaǵa etken duǵasy,
«Úmmetim» der,
«Úmmetim» der kún-túnde...
Ia, Rasýlym, sizdi eske almaý múmkin be?!

Til - kúnáhar, sózim - ársiz, kúlsem - toı.
Kóz - jylatar, ózim - álsiz,
Bilseń ǵoı...
Bir ǵasyrlyq janyma azyq bolar ed...
Birer saǵat janyńyzda júrsem ǵoı...

Joqqa - pana, jesir janǵa - qolqanat...
Ózińizdeı (s.ǵ.s.) kim muqtajdy qorǵamaq?
Jerge sińdi Sizge (s.ǵ.s.) degen saǵynysh,
Jetimderdiń janarynan sorǵalap...

Júrektegi aqyrettik ár qaıǵy...
Syzyq-syzyq ájim qylǵan mańdaıdy.
Qart janyna, tipti, Kúnniń kózi de
Siz (s.ǵ.s.) sekildi jylý syılaı almaıdy.

Túrlenetin kóńiliniń kúıi - myń
Kerbez boldyq, sándep kıgen kıimin...
Joqty bardaı, bardy joq qyp jalmaǵan
Bul álemge...
jetpeıtini - MEIIRIM...

Muqtaj da kóp, duǵa bolǵan - qoregi.
Jaratqannan suraıdy Olar,
Sebebi:
Synaǵyna sabyr qylsa, bir kúni
Paıǵambardy (s.ǵ.s.) kóremiz dep senedi.

Senem mende, júregimmen, janymmen.
Sengen janǵa:
Jánnát - jaqyn,
Qabir - keń...
Rasýl (s.ǵ.s.) úshin tas bolýǵa kóner em -
Tabanynyń astyna kep tógilgen.        

Perishteler, sálemimdi jetkizgin...
Perishteler, sálemimdi jetkizgin!
Shapaǵattan úmitimiz kóp bizdiń...
Paıǵambarlar Sultany etken Táńiri
Arttan ergen Úmmetińbiz tek Sizdiń (s.ǵ.s.)!

Aqıqatqa, Haq jolyna bastaǵan...
Sizge degen saǵynyshtan mas ǵalam! 
Bir kórinip, janymyzdy jubatshy
Ia, Muhammad!
Sálállahý ǵaleıhı ýássálám!..