DÚNIE SÚIISPENShILIGIN JÚREGIMNEN QALAI ShYǴARAMYN?
Bir adam surady:
— Dúnıe súıispenshiligin júregimnen qalaı shyǵaramyn?
Oǵan bylaı dep jaýap berildi:
— Dúnıege ıelik etkenderdi jáne onyń balalaryn qalaı alma-kezek adamdardy aýystyryp, tóńkerip turatynyna qara. Ol adamdardy ózine qalaı baýrap alatyna, keıin tastap ketedi; artynan ertedi de, sońynan qýalatqyzady. Sosyn olardy bir satydan ekinshi satyǵa kóterip, ádepke úıretkendeı bolady, olardyń moıyndaryna ústemdik beredi, qazynalary men ǵajaıyptaryn kórsetedi.
Al olar óz bilimderine, bıligine, jaqsy turmysyna jáne dúnıeniń ózderine qyzmet etip turǵanyna qýanyp júrgende, kenetten dúnıe olardy ustap alyp, qapysyn taýyp, aldap, sol bıiktikten bastarymen tómen laqtyrady. Sonda olar bytyrap, quryp ketedi. Al dúnıe ózi sol kúıi turyp, olarǵa kúledi. Onyń qasynda Ibilis te birge kúledi.
Bul – dúnıeniń Adam (aláıhıssalam) zamanynan bastap Qııamet kúnine deıingi kóptegen sultandarǵa, patshalarǵa jáne baılarǵa istegen isi. Ol birde kóteredi, birde túsiredi; birde alǵa shyǵarady, birde artqa tastaıdy; birde baıytady, birde kedeıletedi; birde kórsetip, birde qor etedi.
Olardyń ishinen óte az ǵana adam dúnıeni jeńip, oǵan jeńdirmeı, Allanyń kómegimen onyń jamanshylyǵynan aman qalady.
Ondaılar – sanaýly adamdar ǵana. Dúnıeniń jamandyǵynan tek dúnıeniń aqıqatyn shyn tanyǵan, odan jáne onyń aıla-tásilderinen qatty saqtanǵan adam ǵana qutylady.
Eı, suraýshy!
Eger dúnıeniń kemshilikterine júrek kózińmen qarasań, ony júregińnen shyǵara alasyń. Al eger oǵan jaı kózben qarasań, onyń sán-saltantyna aldanyp, kemshilikterin kórmeı qalasyń da, ony júregińnen shyǵara almaısyń ári odan beze almaısyń. Ol seni de ózgeni qurtqandaı qurtady.
Sondyqtan nápsińmen kúres — sonda ǵana júregiń tynysh tabady.
Eger ol (nápsi) tynyshtyq tapsa, dúnıeniń kemshilikterin tanyp, odan bezedi. Onyń tynyshtyǵy – júrekten bastaý alady: júrekke qosylyp, syrmen úılesedi de, ekeýiniń ámiri men tyıymyna boısunady. Bergenine razy bolyp, bermegenine sabyr etedi.
Qashan ol tynyshtyqqa jetse, júrekke qosylyp, soǵan ornyǵady. Óziniń basynda taqýalyq tájin, al júrektiń ústinde jaqyndyqtyń (qudaılyq qurmettiń) shapandaryn kóredi.
Senderge ımanǵa kelý, rastaý jáne Allanyń áýlıe quldarynyń keıbir isterimen daýlasyp olardy joqqa shyǵarýdan bas tartý buıyrylǵan. Ol qaýymmen tartyspańdar, olarmen daýlaspańdar, óıtkeni olar – dúnıeniń de, aqyrettiń de patshalary. Olar Haq Taǵalaǵa jaqyndyqty tańdady, sol arqyly Haqtan ózge barlyǵyna ıe boldy.
Alla Taǵala olardyń júrekterin Óziniń jaqyndyǵymen, Oǵan degen úırenshikti súıispenshilikpen, nurlarymen jáne qurmetimen baıytty, toltyrdy. Dúnıeniń kimniń qolynda ekenine, ony kim jep-paıdalanyp jatqanyna olar mán bermeıdi. Onyń bastalýyna da, sońy men ótkinshiligine de qaramaıdy.
Olar Haq Taǵalany ózderiniń syrly kózqarastarynyń aldyna qoıady. Olar joıylýdan qorqyp ta, patshalyqqa úmittenip te qulshylyq etpeıdi. Alla olardy Ózi úshin jáne Onymen máńgilik birge bolý úshin jaratty. Alla sender bilmeıtin nárselerdi jaratady. Ol – qalaǵanyn júzege asyrýshy. (Hazireti Abdýlqadır Jeılanı q.s.)
