QABYL BOLATYN ZEKET PEN SADAQA
Alla Taǵala Baqara súresiniń 273-aıatynda bylaı dedi: «Sondaı Alla jolynda qamalyp shyqpaı otyrǵan, jer júzinde júre almaıtyn, bilmegender, olardy abyroı saqtaǵandyqtarynan baı dep oılaıtyn paqyrlarǵa berińder. Olardy beınesinen-aq tanısyń. Olar adamdarǵa jabysyp suramaıdy. Sender ne qaıyr berseńder rasynda Alla Taǵala ony biledi».
Bul aıat Ashaby Sýffanyń sany 400ge jýyqtaǵan kezde tústi. Mádına Múnáýýárada eshbir baspanalary, aǵaıyn-baýyrlary, týǵan-týystary joq edi. Meshittiń oryndyqtaryn mekendep, ilim úırenetin edi. Paıǵambarymyz sallallahý aláıhı ýá sállámniń dáristeri men ýaǵyzdaryna qatysyp, aqyretterine paıdaly azyq jınaıtyn. Olar ómirlerin Alla jolyna arnaǵan paıǵambar medresesiniń shákirtteri bolatyn. Bir kúni paıǵambarymyz sallallahý aláıhı ýá sállám Ashaby Sýffanyń hal-jaǵdaıyna qarap, kedeılikterin, kórgen qıyndyqtaryn kórip bylaı dedi:
«Ýa, Ashaby Sýffa! Senderge súıinshim bar. Kimde-kim myna senderdiń halderińe jáne óziniń ishki haline razy bolǵan kúıde maǵan qaýyshsa ol meniń eń jaqyn dostarymnan sanalady».
Baqara súresiniń 273-aıaty qansha jerden Ashaby Sýffa jaıly tússe de, úkimi jalpylyqty qamtıdy. Alla razylyǵy úshin dushpanǵa qarsy kúzette turǵan, Alla razylyǵy úshin tizesin tozdyryp, medrese oqyǵan nemese Alla razylyǵy úshin ómirin halyqqa qyzmet etýge arnaǵan jáne mal-múlki joq, nápáqasyn tabýǵa múmkindigi bolmaǵandar ıa da shamasy kelmegen kedeı musylmandar bul aıattyń úkimine kiredi. Bul sanaǵandarymyz qaıyrymdylyq pen sadaqa beriletin eń kórkem jerlerdi quraıdy.
Sol sebepti, yqylas pen dárejeńiz kúndiz nemese túnde, ashyq nemese jarııa qalaı ósip jatqany ózińizshe bilinbeıtindeı arnaıy Alla jolynda jastyq shaǵyn arnaǵan shákirtterge berińiz. Rııakerlik pen ekijúzdilikten saqtanyp, Allanyń razylyǵyn talap etip, týra joldan aınymaý úshin shynaıy kóńilmen shamańyzdyń jetkeninshe eń kórkem sadaqany jasaýdy ádetińizge, minezińizge sińdirý úshin jıi-jıi jaqsylyq jasańyz. Alla Taǵala qandaı jaqsylyq jasasańyz ony biledi, saýabyn zaıa ketirmeıdi.
