QORQYT ATANYŃ NAQYL SÓZDERI (shamamen 9 ǵasyr)
1.Qyz aqyldy eskermes -
Ana úlgisin kórmese,
Ul jarlyqap as bermes -
Áke úlgisin kórmese.
2.Adam ómiri - qamshynyń sabyndaı ǵana qysqa eken,
dosy kóp, urpaq tárbıelegen utady eken.
3.Adam balasy kerýen sııaqty: toqtady, kóshti de ketti.
4.Ólgender qaıtyp kelmeıdi,
Shyqqan jan qaıtyp enbeıdi.
5.Qansha qalyń jaýǵanmen,
Qar kóktemde qalmaıdy.
Gúl jaınaǵan qalyń da,
Qara kúzge qalmaıdy.
6.Qustyń qonar jerin sý biler,
Maldyń barar jerin ný biler.
7.Topyraq taý bolmaıdy.
8.Eski kıimniń bıti ashy,
Jetim balanyń tili ashy.
9.Kók shúıginin kıik biler.
10.Bas aman bolsa bórik tabylady.
11.Dáýletti ul – oshaqtyń qory,
Dáýletsiz ul – atanyń sory.
12.Uldyń kúni kún emes – atadan mal qalmasa,
Ata maly pul emes – basta aqyl bolmasa.
13.Qansha baılyq jısań da – buıyrǵannan artyq jeı almaısyń.
14.Tebegenniń tańyn súzegen aıyrady.
15.At jemeıtin ashy shóptiń shyqqanynan shyqpaǵany ıgi,
Adam ishpes ashy sýdyń aqqanynan aqpaǵany ıgi,
Atasynyń atyn shyǵarmaǵan jigersiz uldyń – týǵanynan týmaǵany ıgi.
16.Saýyttyń qasıeti – qylyshpen urǵanda,
Attyń qasıeti – jaýdan alyp shyqqanda kóriner.
17.Kóp qorqytady, tereń batyrady.
18.Ul aqyldy hosh kórmes – ata úlgisin kórmese,
Qyz jarytyp as bermes – ana úlgisin kórmese.
19.Túbi jat bala týǵandaı bolmas: isher, jer, kıer de keter, biraq, «kórdim» demes.
20.Tákápparlyqty táńiri de súımes.
21.Qara esektiń basyna júgen taqqanmen - tulpar bolmas.
Kúńge sary páı shapan japqanmen - báıbishe bolmas.
22.Anadan ónege kórmegen qyz jaman.
Atadan ónege almaǵan ul jaman.
23.Ata dańqyn shyǵaryp, óziniń tegin qýǵan balaǵa eshkim jetpeıdi.
24.Ótirik sóz - órge baspaıdy.
Aıgúl Kemalbekqyzy Saǵymbaı
