SADAQA BERÝ ÚLKEN NYǴMET, IZGILIK
Baqara súresiniń “Allanyń razylyǵyna bólenýdi jan-tánimen qalap jáne kókirekterindegi ımandy myqtap bekitý úshin dúnıe-múlkin (ıgi jolda) jumsaıtyndardyń mysaly; beıne bir bıik jerde ornalasqan ádemi baý-baqsha tárizdi. Ol baqshaǵa mol jaýyn jaýsa, eki ese artyq ónim beredi. Tipti, mol jaýyn jaýmasa da, sirkirep jaýǵan azǵantaı jaýynnyń, az ǵana ylǵaldyń (nemese shyqtyń) ózi oǵan jetedi. Alla ne istep, ne qoıyp júrgenderińniń bárin kórip turady” degen maǵynadaǵy 265-shi aıaty Alla rızashylyǵy úshin berilgen sadaqanyń ıesine qandaı paıdaly ekenin bildiredi. Bul aıat bylaı tápsirlengen:
Adal múminder mindetsinbeı Alla rızashylyǵynan dámetip sadaqa beredi. Jáne sonyń arqasynda ózin, mal-múlkin, amaldaryn, baýyrlaryn Alla jolynda ustaıdy. Iaǵnı ımannan aınymaı, jomarttyq tanytyp qaıyr, jaqsylyq jasaýdy, ǵıbadat pen boıusyný boıyna sińgen turaqty qasıet bolýyn jáne odan ári túrli izgilik, ǵıbadatty jeńil atqarýdy tilep sadaqa beredi. Olardyń bul sadaqa bergen kezdegi kúıleri bıik jotadaǵy kóz tartar, ádemi, tańdaýly baqqa uqsaıdy. Ol baqtyń árdaıym jemis berip, ıesine paıda beretini anyq. Oǵan mol jaýyn jaýyp, jemisin eki esege arttyrady. Bir jerdi qara tastaı topyraqsyz qaldyratyn jańbyr bul jotaǵa kelgende raqymǵa aınalady. Shynynda ol baq sondaı berekeli; oǵan mol jaýyn emes, jalǵyz shyq, bolmashy ylǵal, jaı búrkip ótken jaýynnyń ózi jetip artylady; onyń báribir jemisi eselep arta túsedi.
Endi soǵan saı amal jasańyz. Jurt kózine túsýge tyryspańyz, ishińizden, syrtyńyzdan yqylas pen izgi nıetten aırylmańyz jáne esińizde bolsyn, Alla Taǵala isteıtin isterińidi kóredi. Oǵan eshteńegiń bilinbeı qalýy múmkin emes. Sóz joq, yqylasty bolǵandy da, kóz boıaýshyny da jaǵdaıyn biledi. Soǵan saı syı ne jaza beredi. Qandaı keremet yntalandyrý men taptyrmas saqtandyrý úlgisi bul.
Al Paıǵambarymyz (s.a.ý.) “Múminniń sadaqasy qııamet kúni oǵan kóleńke bolady” degen. Múmin adamnyń kózi tirisinde muqtaj jandarǵa sadaqa berýi, olarǵa qamqor bolýy, solardyń tirligi men tynyshtyǵyna qyzmet etýi erteń aqyrette saıaly kóleńke ispetti aldynan shyǵady, qııamet kúngi ottan kúıdirmeı qorǵaıdy. Iaǵnı ol sadaqanyń qarymy osylaısha beriledi. Sol sebepti hal-ahýaly barlar sadaqa berýdi úlken nyǵmet dep bilýne tıis.
