Saıat Qamshyger

1978 jyly 1-mamyrda Shyǵys Qazaqstan oblysy, Jarma aýdany, Kezeńsý aýylynda dúnıege kelgen. Qazaqstan Jazýshylar Odaǵynyń múshesi, «Serper» jastar syılyǵynyń laýreaty. «Sary gúl», «Júrektegi aǵystar», «Kóńil kóktemi» atty jyr kitaptarynyń avtory7

Ardaqty paıǵambarǵa (s.ǵ.s)

Áz paıǵambar, jalǵyz Haqtan nár alǵan,
Ketpeısiń Sen júrek, kóńil, sanamnan.
Paıǵambarlar  sultanysyń, ıá, Rasýl,
Myna ǵalam Óziń úshin jaralǵan!

Saǵan degen myń óleń bar sanamda,
Sen degende qulpyrady dalam da.
Jaratqannyń elshisi hám quly, Sen,
Raqym nury bolyp keldiń ǵalamǵa.

Alla desem júregim de jaı tabar,
Sen degende ıman-gúlim jaıqalar.
Mindetińniń aýyrlyǵyn sezingen,
Úmbetińmin kálımany qaıtalar.

Qadyryńdy dál jetkizip jaza alman,
Aıtqanyńdaı sabaq alam ajaldan.
Dinim erip kelip edi ózińmen,
Muzym erip bara jatyr azannan.

Alla ǵana bar dertterdiń daýasy,
(Bilse, shirkin, bar adamzat balasy!)
Kóz aldymda Almatydaı shahar tur,
Al, kóńilde – «paıǵambardyń qalasy».

Áz paıǵambar, ıman edi jıǵanyń,
Adamzatqa Haqtyń dinin syıladyń.
Seni ańsaımyn, eki dúnıe sardary,
Ýahı kútken úńgirindeı Hıranyń.

«Lá ıllaha ılla Alla» bop uranym,
Júzimdi tek Qaǵba jaqqa buramyn.
Ia, rasýlym, júregimde Haq Alla,
Rýhymda – Sen, al qolymda – Quranym.

Senimenen túrlengendeı bar alap,
Júrem endi ár isimdi saralap.
Allaǵa – qul, al Ózińe úmbetpin,
Áz paıǵambar, aıtam saǵan salaýat!
«Sallalahý ǵaleıhı ýassalam...»