Tasbaqa kimdiki?

28 sáýіr 2018 11138 0
Оqý rejımi

Apta boıy tańnyń atysynan kúnniń batysyna deıin jumys istep qatty sharshaıtyndyqtan bir mezgil boı jazyp tynyǵyp qaıtý úshin qala syrtyndaǵy jazdyq baý-baqshaly úıimizge baratynmyn. Baqshadaǵy júzimderdiń arasyn aralasań, sharshaǵanyńdy birden umytyp, sergip shyǵa kelesiń. Árkez ózimmen birge kishkene balamdy da ala baryp, tabıǵatty tamashalatqandy táýir kórem. Aparýyn-aparǵanmen, onyń ne bolsa soǵan tańyrqap suraı beretin suraqtarynan keıde jalyǵyp ta ketetinmin. Biraq suraǵan saıyn birdeńe úırenetindigin ishteı sezem.

Qaıta-qaıta maǵan bir nárse kórsetip:
- Bul kimdiki? – dep suraıdy.Men qolym tımeı jatsa:
- Ol  Allanyki, balam, bizge paıdalansyn dep bergen, - dep qysqa qaıyrýmen shektelem.

Bir kúni baqshada balammen birge júrgenmin. Shirimesin dep jerge salbyrap qalǵan júzim aǵashtaryn joǵarǵy taldarǵa baılap qoıyp jatyrmyn. Bir ýaqytta qasymdaǵy júzimderdiń ár jerge shashylyp, rásýási shyǵyp jelingenin kórgende, óz-ózimdi ustaı almaı:

- Buny kim istedi eken?! Átteń, qolyma tússe, terisin sypyrar em, - dep ashýmen aıǵaılap jibergenimdi ózim de baıqamaı qaldym. Mańaıymdaǵy taǵy bir júzimdi jáýkemdep jatqan eki tasbaqaǵa kózim túskende, jandaryna jetip baryp:

- Maǵan istegenderińdi ózderińe de istemesem be? - dep qatty ashýlanyp, ekeýin de turǵan oryndarynda teris tóńkerip tastadym.   Olar dál osy qalyppen jata berse, ózdiginen tura almaıtyndyqtaryn, kóp uzamaı óletindigi belgili.

Arada bir apta óter-ótpes balam meni taǵy da jaýǵan suraqtyń astyna aldy. Qasyma kelip:
- Áke, bizdiń jerdegi baý-baqsha kimdiki? - dep surady. Men burynǵydaı:
- Allanyki balam, bizge paıdalansyn dep bergen, - dep jaýap berdim.
- Onda siz aýdaryp ketken tasbaqalar kimdiki? – dep suraǵanda, men uıalǵanymnan úndeı almaı qaldym. Óıtkeni onyń ne oılaǵanyn sezip, ózimniń úlken qatelik jibergenimdi uqqan edim.

Birden tysqa shyǵyp mashınamdy ot aldyra sap jazdyq baýymyzǵa keldim. Tasbaqalardyń denelerin jerge jaqsylap kómip, tym bolmaǵanda qateligimdi jýyp-shaıǵym keldi.

Mashınadan túser-túspes tasbaqalardy tastap ketken jaǵyma kóz salǵanymda, eki tasbaqanyń arasynda bir qus ushyp júrgenin baıqadym. Alǵashynda onsha mán bermeı, ólgen tasbaqalardyń óleksesine kep júrgen bolar dep oıladym da qoıdym. Biraq jaqyndap kelip qaraǵanymda, o, toba, óz kózime ózim senbedim. Jańaǵy qus eń jaqyn júzimderden bir-birlep tistep ákelip, aýdarylyp jatqan tasbaqalardy qorektendirip júr. Iá, tasbaqalar óle qoımapty. Jatqan jerlerinde qus arqyly qorektenipti.

Qustyń eki tasbaqany óltirmeı qorektendirgenin uǵyp,  Alla Taǵalanyń ǵajap qudiretine tańǵaldym. Qatty qýana qastaryna júgirip baryp, ekeýin de túzettim. Qus menen qorqyp ushyp ketti de, tasbaqalar bolsa, bastaryn qabyqtaryna tyǵa qoıdy. Aqyryn aıańdap shópterdiń arasyna kirip bara jatqan tasbaqalarǵa uzaq qarap oı qushaǵynda turǵanymda, balam jeńimnen tartty:

- Áke, siz maǵan tasbaqalardyń kimdiki ekenin áli aıtpadyńyz ǵoı?
 Men balamnyń basynan sıpadym:
- Eshqandaı kúmániń bolmasy, qalqam, olar da Allanyki..

Qudaıberdi Baǵashar

Pіkіrler Kіrý