Jańa málimetti eske saqtaýdyń úzdik ádisi

07 aqpan 2020 7423 0
Оqý rejımi

Biz sizderge búgin mıymyzdyń jumys isteý erekshelikterine sáıkes jasalǵan ınterval qaıtalaý ádisi, ıaǵnı jańa málimetti kóp kólemde eske saqtaý ádisi týraly aıtamyz.

Tún, úı jattyǵýyn oryndaý jáne Energııa beretin sýsyn – osyndaı saý emes kórinis bárimizdiń basymyzdan ótken shyǵar. Mektep qabyrǵasynda, ýnıversıtet nemese jumysymyzda osyndaı jaǵdaılarǵa tap bolǵanbyz. Qysqa ýaqyt ishinde kóp kólemde málimetti eske saqtaýyńyz qajet bolǵan kezińizdi eske túsirińiz. Mundaı jaǵdaıda árqaısymyz bir oqýlyqty basymyzda eń bolmaǵanda negizgi málimeti qalsyn dep qaıtalap oqı beretin edik. 

Oqýdyń mundaı túri tez sharshatyp jiberedi ári jalyqtyrady, onyń ústine, tıimsiz. Bul ádis mıymyzdyń jumys isteý ereksheligine saı emes. Baqytymyzǵa oraı, osyny dáleldeı alǵan ǵalymdar mıdyń erekshelikterin esepke alatyn ádisti oılap taýyp, bizge usynyp otyr. Olardyń biri – ınterval qaıtalaý ádisi – ádisterdiń úzdigi deýge bolady jáne sizge jańa tildi meńgerýge, emtıhanǵa daıyndalýǵa kómektese alady.  

Interval qaıtalaý ádisi degenimiz ne?

Interval qaıtalaý ádisi arqyly málimetti este saqtaýdy úırengimiz kelse, myna bir keńesti oqyp shyǵyńyz: málimetti teń bólikterge bólińiz, árbirin úzik(suraq jáne jaýap túrinde) retinde qaǵazǵa jazyp qoıyńyz, keıin olardy taqyryp sektsııalaryna bólińiz. Eger suraqqa durys jaýap berseńiz, onda siz qaǵazdaǵy málimetti jattap aldyńyz degen sóz, ony shetke qoıyńyz. Mundaı qaǵazdardy siz sırek qaraıtyn bolasyz. Eger qaǵazdaǵy suraqqa jaýap berý qıyndaı bastasa, olardy jıi qaraıtyn qaǵazdardyń qataryna qosasyz. 

Bul júıeniń tıimdiligi óz talaptaryńyzǵa saı uıymdastyra alatynyńyzda. Bul ádistiń paıdasynyń sebebi ol bizdiń mıymyzǵa jáne onyń fýnktsııasynyń mehanızmderine saı bolýynda. 

Mı qalaı jumys isteıdi?

Basymyzdaǵy basty múshemizdiń qalaı jumys isteıtinin bir aýyz sózben túsindirip berý múmkin emes. Eger ózimizden «Mı qalaı jumys isteıdi?» dep surasaq – «Kompıýter sııaqty jumys isteıdi» degen sııaqty jaýap qaıtarýymyz múmkin. Buǵan tańǵalýdyń da qajeti joq, sebebi biz tehnologııasy damyǵan dáýirde ómir súrip jatyrmyz jáne mıdy kompıýtermen baılanystyrýǵa ábden bolady. 

Alaıda biz kompıýter men mıdyń málimetti qabyldap, saqtaýyna qatysty jumys ustanymdarynyń irgeli erekshelikterin ońaı umytamyz. Kompıýter eske saqtaýǵa buıryq berilgen málimetti ǵana saqtaıdy. Al mıdyń neni eske saqtap, neni esten shyǵarý kerek ekenin basqara almaımyz jáne onyń eske saqtaý qabiletine bılik júrgize almaımyz. Sondyqtan da siz Dmıtrıı Malıkovtyń birneshe jyl buryn estip alǵan ániniń mátinin eske túsire alasyz da, qazir ǵana jattap alǵan málimetti umytyp qalasyz. 

Mı estelikterdi qalaı jasaıdy?

Mıymyz ben kompıýterdiń ekinshi irgeli ereksheligi málimettiń qalaısha qabyldanyp, qalaısha ıgeriletininde. Óz basymyzda kompıýterdegideı erekshe tártippen, óz oryndarynda saqtalǵan arnaıy málimeti bar faıldardy elestetý ońaı. Biraq biz mıdaǵy bir arhıvti ashyp, onyń ishinen qajetti málimetti alyp jatyrmyz dep oılasaq qatty qateleskenimiz.

Ǵylymnyń aıtyp otyrǵany da sol, jady – bul bizdiń mıymyzdaǵy naqty bir núkte emes. Bul túrli aımaqtarynda saqtalatyn belsendi jumystyń nátıjesi. Eger biz belgili bir jaǵdaıdan habardar bolsaq, ol mıymyzdyń bir núktesinde ǵana saqtalmaıdy, mıdyń túrli jerlerine taralyp, shashylyp ketedi.  

Sonymen qatar, mıdyń múmkindigi shekteýli jáne osy problemany sheshý ázirshe múmkin bolmaı otyr. Ǵalymdar «adam balasy bir degende málimettiń bes-jeti úzigin ǵana eske saqtaı alady» deıdi.

Mıdy qalaı buzý kerek?

Mıdyń ózi mańyzdy dep tapqan málimetti eske saqtap qalatynyn bilemiz. Ol óte jıi kezdesetin oqıǵalar men zattar jaıly málimetti qýatty ete túsedi. Málimetti jıi qarap otyrýdyń negizindegi ınterval ádisi mıdyń osy jumys ustanymyn qoldanady.

Interval qaıtalaýlar – óte qarapaıym, biraq tıimdi áser etetin ádis, bul ádis bizdiń mıymyzdyń jumys isteý mehanızmderin buzatyndaı bolyp kórinedi. Ol bizdiń málimetti qaıta-qaıta qaıtalap, jattaýymyzǵa májbúr etedi, aqylymyzdy beıne bir bulshyqetti shynyqtyrǵandaı jattyqtyrady. Mı osy stımýldardyń áserin alyp, júıke jasýshalarynyń arasyndaǵy baılanystardy kúsheıtedi. Osylaısha siz uzaq merzimdegi estelikterdi eske túsiresiz, oqytýdyń osy ádisin bir ret tekserip kórseńiz, budan eshqashan bas tartpaısyz. Kómekshi quraldardy da paıdalanyńyz – protsessti uıymdastyrýǵa kómektesetin ári qarapaıym etetin qosymshalar. 

Mundaǵy basty másele - mıymyzdyń shekteýleri bar ekenin bile otyryp, mıdyń osy álsizdikterin óz qajetimizge jaratý.

Pіkіrler Kіrý