Jáýken Boranbaı Aldabergenuly

1998 jyly 14-aqpanda Qostanaı oblysy, Torǵaı Alqaby, Naýyryzym aýdanynda dúnıege kelgen. Qostanaı qalasynda orta kásiptik oqý ornyn 2018 jyly támamdaǵan. Qazirgi tańda Aqmola oblysy, Qosshy aýylyndaǵy «Qaýam ad-Dın ál-Itqanı ál-Farabı at-Túrkistanı» respýblıkalyq qarılar daıarlaý Ortalyǵynda bilim alýda.

Saǵyndym RasýlAlla ózińizdi...

Bısmıllá dep bastaıyn aryndy isti, 
Júregim Bir Allaǵa baǵynyshty.
Júrek jardy jyrymmen jetkizeıin, 
Paıǵambarym Muhammedke saǵynyshty. 

Paıǵambarym Muhammed dinnen tergen,
Adamzatty túńilgen túrlendirgen. 
Kórkem minez sabyrlyq hıkmetpen,
Sýsaǵanǵa sýatty nurmen bergen. 

Paıǵambarǵa qasıet dara tunǵan, 
Dara tulǵań tek Allaǵa qaratylǵan.
Barlyq ǵalam turǵanda jaratylmaı, 
Nábı nury eń alǵash jaratylǵan.

Sary altyn súbeli sóziń izgi, 
Sol sózińen baýrady tózim bizdi. 
Saǵynyshtyń ýyty sarsań salyp,
RasýlAlla saǵyndym ózińizdi. 

Salmaqtylyq salynǵan saǵyr úndi,
Qalyń úmbet qasterler qadirińdi.  
Betegemen, bıikte bir qalypty, 
RasýlAlla saǵyndym sabyryńdy. 

Medınemen Mekkede myń ezildi, 
Dúnıege dáriptep din sezimdi. 
Baıyppenen birlesken bııazylyq, 
RasýlýAlla saǵyndym minezińdi. 

Jadyraǵan jaınaǵan jaýqazyndy,
Bes ýaqytpen bekittiń tań jazyńdy. 
Qulshylyqta qurǵatqan kózdiń jasyn, 
RasýlAlla saǵyndym namazyńdy. 

Kerbezdenip kóńilge kıe tundy,
HabıbiAlla úmbetin súıetindi.
Úmbetim dep úkilep úmit artqan, 
Rasýl Alla saǵyndym nıetińdi.

Sharapatpen shaqyrǵan elge dindi,
Jaqyndatqan jan ediń jerge kúndi. 
Jarqyraǵan jaquttaı júziń nurly,
RasýlAlla saǵyndym kelbetińdi. 

Tuǵyrlanǵan Táńirden tuspa tańy,
Múminderdiń ámiri, usta, hany. 
Júregimniń jaıǵasqan jan tórine,
Saǵyndym men Muhammed Mustafany. 

Júrekterde  ımanmen gúl kóktedi,
Orayndalsa Nábıdiń súnnetteri. 
Paıǵambardan úlgini alaıyqshy,
Paıǵambardyń qurmetti úmbetteri. 

Qıamette shapǵatshy - Bir Muhammed, 
Allaǵa jaqyn bolǵan - Qul Muhammed. 
Barlyq úmbet ózińdi saǵynady,
Allanyń nury bolǵan - Nur Muhammed.