JÚREK AINASYN TAZALA

Bir kúni Máýlana Rýmıge bir kisi kelip:

— Men Allany tanyǵym keledi. Onyń qudiretin sezinip, Jamalyn kórgim keledi, — deıdi.

Rýmı oǵan meıirlene jymıyp, qolyna aına ustatady.

— Endeshe, izdenisińdi osy aınadan basta. Áýeli ózińe qara. Júregińniń aınasyn kómeskilegen shań-tozańnan tazart, — deıdi.

Álgi kisi buǵan túsinbeı:

— Biraq men ózimdi emes, Allany kórgim keledi ǵoı! — dep qarsylyq bildiredi.

Sonda Rýmı sabyrmen til qatady:

— Sen áli mánin túsinbediń. Adam Jaratýshysyn kirshiksiz júrekpen sezinedi. Óıtkeni júrek — rýhtyń aınasy. Al ol aına nápsiniń kirinen, qyzǵanysh pen kórealmaýshylyqtan, tákapparlyq pen óshpendilikten arylmaıynsha, aqıqattyń nuryn qalaı tanymaqsyń? Aınań móldirlengen saıyn, jan dúnıeń de jaryqqa bólenedi. Sonda sen tek óz bolmysyńdy ǵana emes, júregińe uıalaǵan ımannyń nury arqyly Jaratýshynyń ulylyǵyn da tereńirek sezine bastaısyń.

Óıtkeni Allany izdeý — alystan bir qubylysty izdeý emes, aldymen óz júregińe úńilý.

Keıde biz aqıqatty alys joldardan, bıik shyńdardan, ǵajaıyp kórinisterden izdeımiz. Al óz ishimizdegi ókpe-renishti, qyzǵanyshty, tákapparlyqty tazartýdy umytyp ketemiz.

Júrek tazarmaı, jan tynyshtyq tappaıdy. Al júrekke tynyshtyq ornamaı, aqıqattyń qadirin tolyq seziný qıyn.

Endeshe, Jaratýshyny tanyǵyń kelse, áýeli júregińniń aınasyn tazart. Óıtkeni júrekke túsken kir aqıqatty ózgertpeıdi, tek ony kórýge kedergi jasaıdy.

Aýdarǵan: Saltanat TEMIRBAIQYZY