2000 ShÁKIRT ELORDA MEShITTERINDEGI JAZǴY SAÝAT AShÝ KÝRSYN AIaQTADY
25 maýsym kúni Astana meshitterindegi «Imanı jaz-2023» jazǵy saýat ashý kýrsy óz máresine jetti.
Bir aıǵa jýyq ýaqyt aralyǵynda 2000-nan astam bala shákirt elorda meshitterinde Quran álippesi, ımandylyq sabaqtarymen qatar tálim-tárbıe dáristerin aldy. Saýat ashý kýrsyndaǵy búldirshinderge sabaq berýge meshit ustazdarymen qatar «Astana» medresesinen arnaıy shákirtter shaqyrylǵan bolatyn. Keshe saýat ashý kýrsynyń aıaqtalýyna baılanysty qaladaǵy meshittiń ımamdary men ustazdary shákirttermen jáne olardyń ata-analarymen bas qosty. Berekeli jıynda meshit ustazdary quttyqtaý sóz sóılep, oqýshylardyń jıyrma kúndik jetistikteri jaıly ata-analaryna baıandap berdi. Az ýaqyttyń ishinde kýrs shákirtteri Alla Taǵalany taný, ata-anaǵa qurmet kórsetý, Islamdaǵy ádepter, durys tamaqtaný, kıim kııý, as ishý, uıyqtaý ádepteri sekildi paıdaly ári mańyzdy dáristerden úlgi-nasıhat ala bildi. Ata-analar balalarynyń osy qysqa merzimde alǵan bilimderine tánti bolyp, meshit ımamdary men ustazdaryna áli de alǵystaryn jaýdyrýda. Saltanatty rásimge arnaıy kelgen ata-analar balalarǵa dáris bergen medrese shákirtterine rızashylyqtaryn bildirdi. Barlyq derlik meshitte ótken jıyn sońynda meshit ustazdary shákirtterge jazǵy saýat ashý kýrsyn tolyq aıaqtaǵanyn rastaıtyn arnaıy kýálik jáne Astana ókildigi atynan syı-sııapat tabystady.
Aıta keteıik, bıyl «Imanı jaz-2023» jazǵy saýat ashý kýrsynda Astana qalasynyń «Áziret Sultan» meshitinde 600 bala, Respýblıkalyq Bas meshitte 500, Nasyr ál-Farabı meshitinde –170 bala, Sádýaqas qajy Ǵylmanı meshiti, Yryskeldi qajy jáne Áljan ana meshitterinde – 120 bala, Aqmeshit, Kýnta qajy, Ál-Ǵanı jáne Raısa ana meshitterinde – 70 bala, Tólebaı meshitide – 60 bala, Ál-Fattah jáne Kóktal meshitterinen – 50 bala, Ár-Rahman men Ás-Sálám meshitinen 30 bala ımandylyq nárimen sýsyndap, tálim alyp shyqty.
