«Ádemi áýezdi azanshy» IV respýblıkalyq azanshylar saıysy bastaldy (LIVE)
Qazaqstan musylmandary dinı basqarmasynyń 30 jyldyǵyna oraı «Ádemi áýezdi azanshy» IV respýblıkalyq azanshylar jarysy Mańǵystaý oblystyq ókildiginiń uıymdastyrýymen Aqtaý qalasyndaǵy oblystyq Beket ata meshitinde ótip jatyr. Elimizdiń ár oblysy men iri qalalarynan 20-ǵa jýyq azanshy baq synaıtyn básekege QMDB Tóraǵasy, Bas mýftı Naýryzbaı qajy Taǵanuly bastaǵan Dinı basqarma ókilderi men aýdan-qala ımamdary qatysýda.
– Azandy kúnde estıtinimiz ras. Keıde jaı áýezdi áýen eken dep qabyldaımyz. Keıde mán bermeımiz. Ol Imannyń ásilin, Islamnyń bolmysyn qamtıdy, ıaǵnı qudiret te, kúsh te, basqarý da, bılik te, ár bir istiń taǵdyry qamtýynda bolǵan Allany búkil nárselerden ulyqtaıdy. Sol arqyly adamdardy tek Allaǵa qulshylyq qylýǵa, Paıǵambarymyz Muhammed (oǵan Allanyń salaýaty men sálemi bolsyn) sońynan ilesýge shaqyrady. Azanshy árbir kisini namazǵa shaqyrady. Baqytqa bastar jolǵa shaqyrady, ıaǵnı seni Allaǵa jolyqtyrar sátke shaqyrady. Bile bilsek, azan Allaǵa unaıtyn sózdiń eń súıkimdisi eken. Oǵan dálel Quran Kárimniń myna aıaty: «Shyn! Men Musylmandardanmyn», - dep, Allaǵa shaqyra otyryp izgi is istegen kisiden sóz turǵysynan jaqsy kim bola alady?». Elimizdiń ár túkpirinen oza shaýyp, áýezimen tańqaldyrǵan azanshylardyń búgingi respýblıkalyq dárejedegi saıysy sátti ótsin! Azan úni jamaǵatymyzdy izgilik pen birlikke, Allanyń razylyǵyna shaqyra bersin! - dedi Bas múftı Naýryzbaı qajy Taǵanuly.
Azanshylar saıysy alǵash ret 2009 jyly elordada, sodan keıin Almaty men Aqtóbe óńirlerinde ótken bolatyn.
–Elimizde osymen tórtinshi ret uıymdastyrylyp otyrǵan saıysty kórermender «Aqtau TV» telearnasy arqyly tikeleı Efırde, sonymen qatar QMDB-nyń «Hıkmet stýdııasy», oblystyq «Beket ata» meshitiniń YouTube arnalary arqyly onlaın rejımde tamashalaýǵa múmkindik aldy,-deıdi QMDB-nyń Mańǵystaý oblysy boıynsha bas ımamy Ánýar Eljanov.
Qurannyń kúmis súrelerin áýezdi únderimen sharyqtata oqıtyn azanshylardyń saıysyna QMDB-nyń «Qajylyq» bóliminiń meńgerýshisi Jándillá Bekjigitov, «Qaýam ad-Dın ál-Itqanı ál-Farabı át-Túrkistanı» respýblıkalyq qarılar daıyndaý ortalyǵynyń dırektory Sadýaqas qarı Oljabaı, QMDB-nyń Aqtóbe oblysy boıynsha ókil ımamy Tólebı Ospan, I-II Respýblıkalyq azanshylar jarysynyń jeńimpazy, Mańǵystaý oblystyq ortalyq meshitiniń azanshysy Álı qarı Qazaq jáne N.Jantórın atyndaǵy oblystyq mýzykalyq drama teatrynyń ártisi Aqtaev Ramazan tórelik etýde.
Aıta ketelik, QMDB tóraǵasy, Bas múftı Naýryzbaı qajy Taǵanuly Mańǵystaýǵa sapary aıasynda oblys ımamdarynyń qatysýymen ótken semınarǵa, azanshylardyń qurmetine arnalǵan qaıyrymdylyq is-sharasyna, sondaı-aq, Aqtaýdaǵy Ábish Kekilbaev atyndaǵy ólketaný murajaıymen tanysyp, qalalyq meshittiń irge tasyn qoıý jáne «El úlesi – páterge» jobasynyń aıasynda muqtaj otbasyna páter syılaý rásimine qatysady.
