AKADEMIK ÁBSATTAR DERBISÁLI ATYNDAǴY DÁRISHANA AShYLDY (FOTO)
Búgin Almaty qalasyndaǵy ál-Farabı atyndaǵy Qazaq ulttyq ýnıversıtetinde ótip jatqan halyqaralyq ǵylymı-teorııalyq konferentsııa barysynda kórnekti ǵalym, akademık, dıplomat Ábsattar qajy Derbisáli atyndaǵy dárishananyń ashylý rásimi ótti.
Saltanatty rásimge Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, ál-Farabı atyndaǵy Qazaq ulttyq ýnıversıtetiniń rektory Janseıit Túımebaev, QR dıplomatııalyq qyzmetiniń qurmetti ardageri Rafııa Derbisálıeva qatysty.
Aıta ketsek, Ábsattar qajy Baǵysbaıuly otandyq din mamandaryn daıarlaýǵa basa kóńil bólip, 2001 jyly Nur-Múbarak Egıpet ıslam mádenıeti ýnıversıtetin ashty. Qazirgi tańda atalmysh ýnıversıtet dinı joǵary bilimdi maman daıarlaıtyn birden-bir oqý orynǵa aınaldy. Meshitterde qyzmet etip júrgen din qyzmetkerleriniń bilimi men biliktiligin arttyrý maqsatynda 2002 jyly «Respýblıkalyq ımamdardyń bilimin jetildirý ıslam ınstıtýtyn» ashyp, ımam, moldalardyń bilimin jetildirý isin qolǵa aldy.
