ÁL-AQSA MEShITINDEGI QAQTYǴYSQA QATYSTY QMDB MÁLIMDEMES
Qazaqstan musylmandary dinı basqarmasy meıirim men shapaǵat, birlik pen ıgilik aıy bolǵan qasıetti Ramazan aıy kezinde kıeli ál-Qudystaǵy Islam dinindegi qasıetti úshinshi meken sanalatyn ál-Aqsa meshitinde bolǵan qaqtyǵysqa qatty alańdaýshylyq bildiredi jáne kúrdeli máseleniń oń sheshimin tabýyn tileıdi.
Qasıetti Ramazan aıynda Allanyń meıiriminen úmit etip, meshitte qulshylyq jasap jatqan musylmandardy kúshpen qýdalap, olardyń ómiri men densaýlyǵyna zııan tıgizip jatqan taraptyń is-áreketin qatań aıyptaımyz.
Alla Taǵala qasıetti Quranda: «Qulyn (Muhammedti) bir túnde Haram meshitinen aınalasyna Ózimiz qut-bereke darytqan Aqsa meshitine keıbir mańyzdy belgilerimiz ben dálelderimizdi kórsetý úshin alyp barǵan Alla – minsiz (muqtajdyq pen dármensizdikten, kemshilik ataýlydan ada). Ol – Sámıǵ (bárin estýshi), Basır (bárin de kórýshi)» («Isra» súresi, 1-aıat) dep baıandaıdy. Bul aıat ál-Aqsa meshitiniń musylman álemi úshin qanshalyqty qasıetti ári ardaqty ekenin aıǵaqtaıdy.
Dinı basqarma elimizdegi barsha musylmandy qasıetti aıda qasıetti mekenniń tynyshtyǵy men sol jerdegi musylman baýyrlarymyzdyń beıbit ómiri úshin duǵa jasaýǵa úndeıdi. Alla Taǵala qasıetti ál-Aqsanyń beıbitshilik pen amandyqta bolýyn násip etsin! Rabbymyz jer betin túrli búlik pen qantógisten saqtaǵaı! Ámın!
