ÁLIHAN MAQSUT ATYNDAǴY ESSE BAIQAÝY ÓTTI (FOTO)
Búgin «Áziret Sultan» meshitiniń uıymdastyrýymen «Imanı jaz-2023» jazǵy saýat ashý kýrsy shákirtteri arasynda Álıhan Maqsut atyndaǵy Esse baıqaýy ótip, úzdikter anyqtaldy.
Bıyl «Áziret Sultan» meshitinde ótken «Imanı jaz-2023» jazǵy saýat ashý kýrsynda 600-ge jýyq shákirt bilim alǵan bolatyn. Atalǵan joba aıasynda túrli sporttyq saıystar men shyǵarmashylyq baıqaýlar uıymdastyryldy. Sondaı-aq, bıylǵy jyldyń jazǵy kýrsynda «Álıhan Maqsut atyndaǵy Esse baıqaýy» ótti.
Álıhan Maqsut 2018-2019 jyldary eki jyl qatarynan respýblıkalyq «Áziret Sultan» meshiti uıymdastyrǵan «Imanı jaz» jazǵy saýat ashý kýrsyna qatysyp, qoǵamdyq isterge qatysyp, shyǵarmashylyq baıqaýlardan úzdik shyǵyp, kózge túsken bolatyn. Ol ómirden erte ozǵan daryndy oqýshy, fızıka, robottehnıka salalary boıynsha respýblıkalyq, halyqaralyq pándik olımpıadalar men ǵylymı jobalardyń birneshe dúrkin jeńimpazy. Meshitimizde bilim alǵan daryndy shákirt Álıhan Serikzatulynyń ǵıbratty ǵumyryn mektep oqýshylaryna úlgi ete otyryp, qoǵamǵa, týǵan jerge qyzmet etýge baýlý – Esse baıqaýynyń negizgi maqsaty.
Dinı basqarmanyń kontsert zalynda ótken marapattaý keshinde baıqaýǵa qatysýshy shákirtterge «Álıhannyń armany» atty derekti fılm kórsetildi. Sondaı-aq, belgili qoǵam qaıratkerleri Qýandyq Qystyqbaev, Muratbek Toqtaǵazın, jas óner juldyzdary Aıkerim Tileýbek, Muhamedáli Júginisovter qatysyp, jeńimpazdardy marapattady.
Astana qalasynyń jáne «Ázire Sultan» meshitiniń bas ımamy Erbolat Nuryldauly shákirtterdi el damýyna úles qosýǵa shaqyryp, nasıhat aıtty. Álıhannyń ákesi, belgili aqyn Serikzat Dúısenǵazy óz rızashylyǵyn bildirip, baıqaýǵa qatysýshy shákirtterge ónegeli ómir tiledi.
Aıta keteıik, L.N. Gýmılev atyndaǵy EUÝ jýrnalıstıka jáne saıasattaný fakýltetiniń ǵalymdarynan quralǵan komıssııa músheleri shákirtterdiń alpystan asa jumysyn qarap, ishindegi eń myqtylaryn iriktep shyǵardy. Jeńimpazdarǵa QMDB Astana ókildiginiń atynan jáne Álıhan Maqsut atyndaǵy daryndy balalardy qoldaý qory atynan baǵaly syılyqtar berildi.
Источник: Aidos
