Almatyda 5 qaıyrymdylyq mekemesi ashyldy (FOTO)
Keshe Almaty qalasynyń Medeý, Alataý, Naýryzbaı, Túrksib aýdandarynda Qazaqstan musylmandary dinı basqarmasynyń 5 birdeı qaıyrymdylyq mekemesi ashyldy.
Aldymen, Medeý aýdany Amanqul ata meshiti janynan «Kók-Tóbe», Alataý aýdany Beket ata meshiti janynan «Shańyraq», «Qaraǵaıly», «Arafat», «Yntymaq», «Qaırat» meshitteriniń qaıyrymdylyq mekemeleriniń saltanatty ashylý rásimi ótti.
Saltanatty sharaǵa QMDB-nyń birinshi tóraǵa orynbasary, naıb múftı Naýryzbaı qajy Taǵanuly, QMDB Ýaqyp jáne qaıyrymdylyq bóliminiń meńgerýshisi Kamaljan Turdybaev, Almaty qalasynyń ókil ımamy Erkinbek Shoqaı, Medeý, Alataý aýdandarynyń dinı qyzmetkerleri jáne jergilikti bılik ókilderi qatysty.
Sharada sóz alǵan Naýryzbaı qajy Taǵanuly eń aldymen, qaıyrymdylyq mekemesin ashýdaǵy maqsat – óskeleń urpaqty ımandylyq pen adamgershilikke, ǵylym men ónerge baýlý, shyǵarmashylyq qabiletin damytý, ulttyq salt-dástúrge saı tárbıeleý, dinı-aǵartý jumystaryn júrgizip, ıslam negizderin úıretý, dinı oqý oryndaryna talapker daıyndaý, balanyń ómirge jáne ózine degen senimin arttyrý, elimizde otbasylyq qundylyqtaryn nasıhattaý, turmys jaǵdaıy tómen otbasylarǵa áleýmettik-rýhanı kómek kórsetý, qaıyrymdylyq sharalaryn uıymdastyrý ekenin atap ótti. Sonymen qatar, Dinı basqarmanyń san-salaly qyzmeti aıasynda negizgi tórt baǵyt boıynsha jumystarǵa basymdyq beretinin, sonyń biri – qaıyrymdylyq ekenin de tilge tıek etti.
Odan keıin Medeý aýdany ákiminiń orynbasary Aıdos Nurlybaev pen Shańyraq yqsham aýdanynyń ákimi Halel Baıadılov qalamyzda ashylǵan qaıyrymdylyq mekemeleri – qoǵam damýy men baıandy bolashaqtyń irgetasyn qalaıtyn ordalardyń biri ekenin jetkizdi.
Jıyn sońynda Medeý jáne Alataý aýdandarynyń jamaǵaty alǵys retinde naıb múftı Naýryzbaı qajy Taǵanulynyń ıyǵyna shapan japty.
Qaıyrymdylyq mekemelerdiń lentasy qıylyp, sharaǵa qatysýshylar jańa mekemelerdiń shákirtterge arnalǵa jatyn bólmesin, kitaphana, dárishana jáne ustazdar kabınetin aralap kórdi.
Mekeme óz qyzmetinde QR Konstıtýtýtsııasyn, Azmattyq Kodeksin, «Kommertsııalyq emes uıymdar týraly», «Qazaqstan Respýblıkasyndaǵy memlekettik jastar saıasaty týraly», «Balanyń quqyǵy týraly», «Bilim týraly», «Dinı qyzmet jáne birlestikter týraly» Zańdaryn, sonymen qatar atalǵan mekeme týraly Dinı basqarmanyń sheshimimen qabyldanǵan Jarǵyny basshylyqqa alady.
Aıta ketsek, buǵan deıin dál osyndaı mekeme Nur-Sultan qalasy men Mańǵystaý, Almaty oblystarynda ashylǵan bolatyn.
