ALMATYDA ǴULAMALAR KEŃESINIŃ HHHVI MÁJILISI BASTALDY (FOTO)

Búgin Almaty qalasynda Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasy janyndaǵy Ǵulamalar keńesiniń HHXVI májilisi bastaldy.

Májilisti ashqan Bas múftı Naýryzbaı qajy Taǵanuly: «Bıylǵy 2022 jyldy ózderińizdiń qoldaýlaryńyzben «Islam – yntymaq pen birlik dini» jyly dep jarııaladyq. Osy jyl aıasynda respýblıkalyq konferentsııalar, óńirlik forýmdar ótkizdik. Jyl sońynda «Islam – yntymaq pen birlik dini» kitabyn basyp shyǵardyq. Sondaı-aq bıyl QMDB janynan Sarapshylar keńesi men Aqsaqaldar keńesin qurdyq. Bul bastama memleket jáne qoǵam tarapynan da úlken qoldaýǵa ıe boldy. Aǵartý salasy boıynsha da «MUFTIYAT» baspasynan birneshe jańa kitap oqyrmanǵa jol tartty» dedi.

QMDB Tóraǵasy sondaı-aq Ǵulamalar keńesiniń jumysy joǵary deńgeıde ótip kele jatqanyn alǵa tartyp, bıyl keńes jumysy 3 ret ótkenin, onda 5 qujat 16 pátýa qabyldanǵanyn atap ótti.

Aıta ketsek, Ǵulamalar keńesiniń HHXVI májilisinde «Kólikti kólikke aıyrbastaý (barter) úkimi», «Saqtandyrý qyzmeti týraly úkim», «Menshiginde joq zatty satýdyń úkimi», «Elektrondy temekini qoldanýdyń úkimi» jáne t.b. pátýalardyń mátini talqylanýda. Basqosýda budan bólek QMDB-nyń birqatar jobalarynyń mazmuny qaralýda.