ALMATYDA ǴULAMALAR KEŃESINIŃ XXXVIII MÁJILISI BASTALDY (FOTO)

Búgin Almaty qalasynyń Ortalyq meshitinde Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasy janyndaǵy Ǵulamalar keńesiniń XXXVIII májilisi bastaldy.

Májilis jumysyn ashqan QMDB Tóraǵasy Naýryzbaı qajy Taǵanuly:

«Allaǵa shúkir, Ǵulamalar keńesiniń jumysy joǵary deńgeıde ótip keledi. Sonyń nátıjesinde qoǵamǵa paıdaly birneshe ózekti pátýalar jarııalandy. Tıisti kontseptýaldy qujattar qabyldandy. Sonyń taǵy bir jemisi jýyrda elordamyzda V Respýblıkalyq ımamdar forýmyn ótkizdik. Dinimizge, qoǵamǵa qatysty 3 mańyzdy qujat qabyldandy. Forýmda «Imamnyń jamaǵat namazyn ótkizý tártibi», «Qazaqstan musylmandary dinı basqarmasynyń rýhanı (dinı jáne ulttyq) qundylyqtardy nasıhattaýdaǵy róli» jáne «Qajynyń rýhanı kelbeti» tuǵyrnamasy qujattary qaralyp, qabyldandy. Atalǵan qujattardy ózderińiz Keńes jumysynda talqyladyńyzdar, atsalystyńyzdar. Endi jaqyn kúnderde ózderińizben bekitken úlken jobamyzdyń biri «Islam Entsıklopedııasy» kitaby jaryq kóredi Alla qalasa. Búgingi Májilis otyrysyna sáttilik tileımin» dedi Bas múftı.

Ǵulamalar keńesinde «Tenderge qatysý úkimi», «Táýássýl jasaýdyń úkimi», «Karmın qyshqylynyń úkimi», «Internet-dúken arqyly saýda jasaýdyń úkimi» syndy birneshe pátýa qaralady dep josparlanýda.