ALMATYDA QMDB ǴULAMALAR KEŃESI ÓTÝDE (FOTO)

Búgin Almaty qalasynda Bas múftı Naýryzbaı qajy Taǵanulynyń tóraǵalyǵymen QMDB Ǵulamalar keńesiniń 41-shi májilisi ótýde.

Keńes jumysynda QMDB Tóraǵasy: «Allaǵa shúkir, Ǵulamalar keńesiniń jumysy joǵary deńgeıde ótip keledi. Sonyń nátıjesinde birneshe qoǵamǵa paıdaly, ózekti pátýalar jarııalandy. Tıisti kontseptýaldy qujattar qabyldandy.

Taǵy bir qýanyshty jańalyqtyń biri kópten beri kókeıde júrgen «Babalar izimen: qazaq dalasyndaǵy musylmandyq mektep» kitabymyzdyń tusaýyn kestik. Ótken apta Elordamyz Astana qalasynda, mine, búgin zııaly qaýym men ǵalymdardyń qatysýymen Almaty qalasynda da ótkizip aldyq. Osy oraıda osy eńbektiń jaryqqa shyǵýyna keńeste talqylap, atsalysqan barshańyzǵa shynaıy alǵysymdy bildiremin. Alla razy bolsyn» dedi.

Aıta keteıik, Ǵulamalar keńesinde «máıek (ultabar) fermentiniń úkimi», «teriden jasalǵan jelatın úkimi», «táýarrýq kelisimshartynyń úkimi» pátýalary, «Ýaǵyz aıtýdyń ádebi men mádenıeti» qujaty, «Tártiptik keńes erejesi» men «Jastar keńesiniń erejesi» qujattary talqylanyp, bekitiledi. Sondaı-aq Qazaqstannyń 1 naýryzdan bastap bir ýaqyt beldeýine kóshýine baılanysty juma namazynyń ýaqytyn bekitý josparlanǵan. Qabyldanǵan pátýalar mátini múftııattyń resmı aqparat quraldarynda jarııalanady.

​