ALMATYDA «SOPYLYQ SYRY» KITABYNYŃ TUSAÝKESER RÁSIMI ÓTTI (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty qalasyna barǵan saparynda Nur-Múbárak ýnıversıtetinde «Sopylyq syry» kitabynyń tusaýkeser rásimine qatysty.

«Ózderińiz jaqsy bilesizder, qazir jastar arasynda kitap oqý úrdisi qalyptasyp keledi. Jalpy jurtshylyq tarapynan izgilik, ımandylyq, adamgershilik taqyrybynda jazylǵan kitaptarǵa degen suranys jyl saıyn artyp keledi.

Biz halqymyzdyń rýhanı suranysyn qanaǵattandyrý maqsatynda búginge deıin tól baspamyz «MUFTIYAT» baspasynan rýhanı, dinı, motıvatsııalyq baǵytta, sonymen qatar dástúrimiz ben saltymyzdy dáripteıtin 50-ge jýyq kitap shyǵaryp, halyqqa meılinshe taratyp kelemiz. Maqsatymyz – dinı aǵartýshylyq baǵyttaǵy jumystarymyzdy jandandyrý.

Oqyrmanǵa jol tartyp otyrǵan kezekti «Sopylyq syry» eńbegimiz siz ben bizdiń jandúnıemizge úlken rýhanı azyq bolaryna senimdimin. Óıtkeni kez kelgen kitap oqyrmannyń dúnıetanymyn baıytyp qana qoımaı, túısigin jaqsylyqqa ózgertedi» dep atap ótti Bas múftı Naýryzbaı qajy Taǵanuly.