ALMATYDA SYǴANAQI INSTITÝTYNYŃ FILIALY AShYLDY (FOTO)
Búgin Almaty qalasynda «Hýsamýddın as-Syǵanaqı» ıslam ınstıtýtynyń Quran ıjaza bólimi ashyldy.
Igi is-shara qasıetti Quran aıatymen bastalyp, Bas múftı Naýryzbaı qajy Taǵanuly jamaǵatty jańa ǵımarattyń ashylýymen quttyqtady.
«Ózderińizge málim, jýyrda Astana qalasynyń Syǵanaq kóshesiniń boıynan Hýsamýddın ás-Syǵanaqı atyndaǵy ıslam ınstıtýty ashyldy. Bul – rýhanı saladaǵy kópten kútken úlken qýanyshty jańalyqtyń biri boldy. Maqsatymyz – ımamdarǵa tereń bilim berý, klassıkalyq eńbekterdi oqytý, arab tilin jetik meńgerýine yqpal etý, dinı máselelerdi túsindirý qabiletin ashý.
Sondaı-aq bul bastama dinı bilim izdep shetelge ketetin jastardyń óz elimizde bilimin jetildirýine múmkindik beredi. Biz Astanadaǵy ınstıtýt janynan jas qarılardy jigerlendirý maqsatynda Ijaza berý ortalyǵyn iske qostyq.
Birneshe baǵyttan turatyn Ijaza berý ortalyǵyn támamdaǵan shákirtter ıjaza kýáligine qol jetkizedi. Bul – tereń dinı bilim alam, Qurandy tolyq jattaımyn degen jas mamandardyń, bolashaq ǵalymdardyń rýhanı ári ǵylymı ortalyǵy bolady.
Búgin Almaty qalasynda bolashaq qarılardyń ıgiligine berilgen Ijaza ortalyǵynyń bólimshesi de osy maqsattarymyzdy júzege asyrady degen senimdemin. Jańa ǵımarat qutty bolsyn!», – dedi Naýryzbaı qajy Taǵanuly.
Bas múftı ortalyqtyń bólimshe dırektory bolyp taǵaıyndalǵan belgili qarı Aqjoltaı Baqytjanulyna izgi tilegin bildirdi. QMDB Tóraǵasy bólimshe ǵımaratyn aralap, jańadan qabyldanǵan shákirtterge nasıhat aıtty.
