Almatydaǵy «Baıken» meshitinde «Balapan qarı» ortalyǵy ashyldy (FOTO)

Qazaqstan musylmandary dinı basqarmasynyń qoldaýymen «Jastar jylyna» oraı, Almaty qalasy Baıken meshitinde «Balapan qarı» ortalyǵy ashyldy.

Ortalyqtyń ashylý saltanaty baldaı tátti búldirshinimizdiń Quran oqýymen bastaldy. Sodan Baıken meshitiniń Bas ımamy Danııar Jumabaev kelgen qonaqtarǵa quttyqtaý sóz sóılep, ortalyqtyń ashylý maqsatyna toqtalyp ótti.

Odan ári Almaty Ortalyq meshitiniń Bas ımamy Erkinbek qarı Kerimbekulyna sóz berildi.

Bas ımam: «Qurmetti ıgi jaqsylar! Búgin, minekı, QMDB-nyń tóraǵasy, Bas múftı Serikbaı qajy Oraz hazrettiń qoldaýymen «Balapan qarı» ortalyǵy ashylyp otyr. Bul – úlken serpilis, zor qýanysh. Árıne, baıandy bolashaq kepili – ımandy da bilimdi, básekege qabiletti, deni saý urpaq ekeni belgili. Al, mundaı tálimdi tárbıeniń bastaýy – otbasydan, balanyń jas kúninen bastalady. Sondyqtan búldirshinderimizdiń osyndaı ortalyqtarda tálim-tárbıe alýy kóńilge qýanysh syılaıdy», – dep ortalyqtyń ashylýymen quttyqtady. 

Sondaı-aq, ortalyqtyń ashylýyna Bostandyq aýdanynyń bas ımamy Atashov Áset, Almaty Ortalyq meshitiniń naıb ımamy Ersin Ámire jáne bas ustazy Talǵat Sapanov qatysyp, ózderiniń tilektestik nıetterin bildirdi.

«Balapan qarı» ortalyǵyna jaýapty ustazy Malıka Ergeshova ortalyqqa bala qabyldaý sharttaryna toqtalyp ótti. Ol ortalyqqa qabyldanatyn búldirshinderdiń jasy – 5 pen 7 jas aralyǵynda bolý kerektigin jáne balalardy dáriske alyp kelý-alyp ketý ata-ananyń mindetinde ekenin aıtty.

Al, meshit aqsaqaly Ábdisultan Ospanov atamyz ortalyqtyń ashylýyna aq tilegin aqtaryp, qol jaıyp bata berdi.

Kelgen qonaqtar «Balapan qarı» ortalyǵynyń tusaýyn kesip,búldirshinderdiń tálim alatyn bólmesimen tanysty.

Osylaısha shashý shashylyp, aq tilektermen bastalǵan ıgi is odan ári jalǵasyn taýyp, búldirshinderdiń jarqyn bolashaǵyna jol bastaı bersin deımiz.