«Aqmeshitte» Ramazan aıyna arnalǵan semınar ótti (FOTO)

Búgin, qasıetti Ramazan aıynyń qarsańynda Nur-Sultan qalasyndaǵy «Aqmeshitte» ulyq aıdyń qadir-qasıetin túsindirip, jamaǵatty aqparattyq saýattandyrý maqsatynda «Ramazan – rýhanı tazarý jáne durys tamaqtaný» atty semınar bolyp ótti.

«Aqmeshit» meshitiniń bas ımamy Dáýren Mýslımov pen belgili dıetolog, tamaqtaný jónindegi keńesshi maman Anar Kókeevalar ótkizgen semınardyń jamaǵat úshin jóni bólek boldy. Qasıetti aıdyń mańyzdylyǵy jóninde, orazanyń qaǵıdalary men talaptary týrasyndaǵy ımam ýaǵyzy qatysýshylarǵa Ramazannyń rýhanı paıdasynan habardar etip, mol maǵlumat berildi. Dıetolog maman Anar Kókeevanyń dárisi de qatysýshylar úshin tyń jaıttardyń betin ashyp, aýyzashar men sáresi kezinde oryn alyp jatatyn keıbir qatelikterden aýlaq bolýǵa úıretti.

Semınar sońynda jamaǵat suraqtaryna kezek berilip, oraa kezinde em-dom alý máseleleri, sapardaǵy musylmannyń áreketteri, orazany buzatyn jáne buzbaıtyn jaǵdaılar týraly keńinen nasıhat aıtyldy.

Aıta keteıik, qasıetti Ramazan aıy bıyl mamyr aıynyń 6-juldyzynda bastalady. Qasıetti Qadir túni 31-mamyrdan 1-maýsymǵa qaraǵan kúni kútiledi. Al, ulyq mereke Oraza aıt 5-maýsymda bastalady.

Ramazan jaıly barlyq suraqtaryńyzdy respýblıkalyq «Áziret Sultan» meshitindegi Call ortalyqqa qoıýǵa bolady. Ortalyq 24 saǵat boıy úzilissiz qyzmet jasaıdy: 8 (7172) 33-30-30.