Aqsaqaldar keńesi marqumdardyń rýhyna Quran baǵyshtady (FOTO)
Búgin elordada Qazaqstan musylmandary dinı basqarmasy janynan qurylǵan Aqsaqaldar keńesiniń músheleri respýblıkalyq «Áziret Sultan» meshitinde qańtar aıyndaǵy qaıǵyly oqıǵada qaza tapqan jandardyń rýhyna qasıetti Quran aıattaryn baǵyshtady.
«Alla Taǵala Otan qorǵaý jolynda opat bolǵan sarbazdarymyz ben qaıǵyly oqıǵa kezinde qaza tapqan beıbit turǵyndardy meıirimine alǵaı. Jaratýshy Iemiz jaraqat alǵan jandardyń tez arada saýyǵyp ketýin násip etkeı. Alla Taǵala elimiz ben jerimizge turaqtylyq pen tynyshtyq berip, birligimiz ben beıbitshiligimizdi baıandy etkeı!» – dep duǵa jasady Bas múftı Naýryzbaı qajy Taǵanuly.
Aıta keteıik, búgin elordada Qazaqstan musylmandary dinı basqarmasy janynan Aqsaqaldar keńesi qurylyp, keńestiń alǵashqy jıyny ótti. Bas múftı Naýryzbaı qajy Taǵanulynyń tóraǵalyǵymen ótken jıynǵa memleket jáne qoǵam qaıratkerleri – Ómirzaq Ozǵanbaıuly, Amangeldi Aıtaly, Baqytjan Ertaev, Oralbaı Ábdikárimuly, Ǵarıfolla Esim, Smaǵul Elýbaı, Jabal Erǵalıev, Marat Toqashbaev, sondaı-aq ardager ımamdar qatysty.
