Aqtaý qalasynda «Erjan haziret» meshiti ashyldy (FOTO)
Búgin, qasıetti juma kúni Mańǵystaý oblysynyń ortalyǵy Aqtaý qalasynda «Erjan haziret» meshitiniń ashylýy rásimi ótti. Igi sharaǵa Mańǵystaý óńirine jumys saparymen kelgen QMDB Tóraǵasy, Bas múftı Naýryzbaı qajy Taǵanuly arnaıy qatysty.
Jańa meshittiń ashylý saltanatyna oblys ákimi Nurlan Noǵaev, QMDB Aqsaqaldar keńesiniń músheleri men Qazaqstannyń batys óńiri aqsaqaldary da qatysty. Qulshylyq úıiniń ashylýynda sóz alǵan Bas múftı meshittiń máni týraly aıta kelip, meshit salýdyń mol saýaby bar ekenin atap ótti.
«Jańa meshitke esimi berilgen Erjan haziret Mańǵystaý óńirine ǵana emes, barsha qazaq topyraǵyna din Islamnyń dińgegin qadaǵan, asyl dinimizdiń aıasyn keńitken din qaıratkeri boldy. Ol Buqarada bilim alyp kelip, Beket atanyń jolyn jalǵap, bar ǵumyryn urpaqqa bilim berýge arnady. Meshit ashyp, bala oqytty. Jastarǵa tálim-tárbıe berdi, olardy ımandylyqqa, adamgershilikke baýlydy. Alaıda keńestik júıe haziretti qýǵyndap, zábir kórsetti. Búginde esimi elge jaıylyp, meshit atyn ıelenip otyr. Alla Taǵala osy meshittiń boıy kóterýine sebepker bolǵan barsha azamattarǵa saýaptan jazsyn!» – dedi Naýryzbaı qajy Taǵanuly.
Sondaı-aq Bas múftı búginde meshitterdiń qoǵamdaǵy barlyq máseleniń sheshimin tabýǵa, eldegi birliktiń, yntymaqtyń saqtalýyna tikeleı sebepshi bolatyn orynǵa aınalǵanyn, balaǵa at qoıý, neke qıdyrý, janaza shyǵarý syndy kóptegen dinı rásimder meshitte oryndalatynyn alǵa tartty.
«Jańa meshit qulshylyqtyń ǵana ordasy bolyp qalmaı, rýhanı hám mádenı-aǵartý, birlik pen berekeniń oshaǵyna aınalady degen oıdamyz. Sonymen qatar jańa meshitimiz salt-dástúrimizdiń, taǵylymǵa toly tarıhymyzdyń nasıhatshysy ári qaıyrymdylyqtyń ortalyǵy bolady dep senemiz. Alla soǵan jetkizgeı!» – dedi QMDB Tóraǵasy.
