Aqtóbede qaıyrymdylyq mekemesi ashyldy (FOTO)
Búgin Aqtóbe qalasynda «Ás-Sálam» jeke qaıyrymdylyq mekemesi (medrese) ashyldy.
Mekemeniń ashylý rásimine qatysqan Bas múftı Naýryzbaı qajy Taǵanuly: «Dinı basqarma jeti baǵyt boıynsha jumystarǵa basymdyq beredi. Sonyń biri – qaıyrymdylyq. Maqsatymyz – kópbalaly, kómekti qajet etetin otbasydan shyqqan oqýshylarǵa qoldaý kórsetý. Osy mekemege qabyldanǵan oqýshylar mekteptegi sabaǵyn oqýmen qatar ımandylyq dáristerin tyńdaıdy. Maqsat – otanshyl, ımandy, bilimdi jastar sanyn arttyrýǵa úles qosý. Osy rette Dinı basqarma bastamasyn qoldap, Qaıyrymdylyq mekemesin salýǵa demeýshi bolǵan azamattarǵa aıryqsha alǵysymdy bildiremin» deı kele, ıgi iske uıytqy bolǵan bir top azamatqa alǵys hatyn tabystady.
Aıta ketsek, búginde Qaıyrymdylyq mekemesinde 42 shákirt tárbıelenip jatyr.
Mekemede shákirtterdiń jan-jaqty bilim, tálim-tárbıe alýy úshin qolaıly jaǵdaıdyń barlyǵy jasalǵan. Jataqhana bólmeleriniń barlyǵynda shákirtterge qajetti jýyný bólmesi, dáret alý oryndary, kıim jýý, útikteý, t.b. oryndar qarastyrylǵan. Ashana zaman talabyna saı jabdyqtalǵan. Ol jerde shákirtterge úsh mezgil tamaq beriledi. Qaıyrymdylyq mekemesiniń jalpy kólemi – 731 sharshy metr.
Sabaq beretin ustazdardyń barlyǵy joǵary bilimdi. Shákirtterge matematıka, aǵylshyn tili, sheshendik óner, qazaqtyń tarıhı tulǵalary, t.b. pánderden sabaq beriledi.
