Aqtóbelik qarı tuńǵysh ret shákirtine ıjaza berdi (FOTO)
Aqtóbe oblystyq «Nur Ǵasyr» meshitinde naıb ımam, «Aqjar» qaıyrymdylyq mekemesiniń (qarılar ortalyǵy) dırektory Bekjan qarı Áldenovtiń shákirtine ıjaza berý rásimi saltanatty túrde ótti.
Aıtýly sharaǵa oblys, qala, aýdan ımamdary men QMDB aqsaqaldar keńesiniń músheleri, meshit jamaǵaty t.b qatysty.
«Maǵan Nurıslam Ǵabıtuly kelip Qurandy basynan sońyna deıin Hafs ‘an ‘Asım rıýaıaty, ásh-Shatyıbııa joly boıynsha tolyq Qurandy jatqa oqyp berdi. Allanyń járdemimen tolyq oqyp aıaqtaǵan soń menen ıjaza berýimdi ótindi. Óz kezeginde men oǵan qashan jáne qaı jerde bolmasyn oqýǵa ári úıretýge ruqsat beretin osy sala ókilderiniń sharttaryna saı (ıjaza) berdim. Sondaı-aq men oǵan joǵaryda aıtylǵan rıýaıatpen Qurandy qurmetti sheıh Halıd Hasan Rashıd Dárýıshaǵa oqyp bergenimdi jetkizdim. Al ol kisi Alla elshisine (oǵan Allanyń salaýaty men sálemi bolsyn) deıin jalǵasatyn ısnádpen óziniń eki ustazy sheıh Muhammed Fáhd Harýf pen sheıh Mýstafa Áqsaýı ál-‘ıntábıden ıjaza alǵan.
Alla Taǵala bul ruqsatnamany yntaly alǵyrlarǵa jetkizsin ári olarǵa kórkem minez-qulyq berip olardan qabyl alsyn! Ámın!» dedi shákirttiń ustazy Bekjan qarı Áldenov.
Aıta ketsek, saltanatty sharada Nurıslam qarı Ǵabıtulyna oblystyq «Nur Ǵasyr» meshitiniń naıb ımamy Muhammedısmaıl Shadman jamaǵat tarapynan syı retinde Umraǵa joldama tabystady. Nurıslam qarı Ǵabıtuly 2003 jyly dúnıe kelgen. Túrkııa astanasy Stambýl qalasyndaǵy «Cennet Kur'an kursu»-nyń 2019-2021 jylǵy túlegi. Qazirgi tańda Aqtóbe qalasy, «Aqjar» qaıyrymdylyq mekemesiniń shákirti. Sondaı-aq Nurıslam Qabat – Aqtóbe oblysynan shyqqan úshinshi ıjazaly qarı. Dinı bilimin jetildirip, barlyq qıyndyqty eńserip, joǵary dárejege jetken Nurıslam qarı Ǵabıtuly men ustazy Bekjan qarı Amankeldiulyn zor tabysymen quttyqtaımyz. Árdaıym Allanyń qoldaýy bolyp, ıgi qadamyna nur jaýsyn!
