ARYS QALASYNDA MEShIT PEN QARILAR ORTALYǴY QATAR AShYLDY (FOTO)
Búgin Túrkistan oblysynyń Arys qalasynda «Hazireti Ábý Bákir ás-Syddyq» meshiti men Áz Táýke han atyndaǵy qarılar ortalyǵy qatar ashyldy. Jamaǵattyń qýanyshyn bólisýge QMDB Tóraǵasy, Bas múftı Naýryzbaı qajy Taǵanuly, aýdan ákimi Gúljan Mamytqyzy, jergilikti turǵyndar men qonaqtar qatysty.
Saltanatty rásim qasıetti Quran aıattaryn oqýmen bastalyp, alǵashqy sóz Dinı basqarma tóraǵasyna berildi. Bas múftı dinimizdegi meshit pen medrese, qarılar ortalyǵynyń mańyzy jaıly nasıhat aıtty.
«Jaqynda ǵana elimizdiń ulttyq merekesi Respýblıka kúnine oraı Astanada múftııattyń uıytqy bolýymen Birinshi Halyqaralyq Quran jarysyn ótkizdik. Álemniń 28 elinen 30 qarı qatysty. Eki kún boıy Respýblıkalyq Bas meshitte qarılarymyz elimizdi nurǵa bólep Quran oqydy. Árıne mundaı deńgeıdegi jarystar árbir Quran jattaǵan balaǵa jiger syılaıtyny anyq. Búgingi ashylyp jatqan meshitimiz, qarılar ortalyǵynan shyqqan shákirtter de álemdik deńgeıge shyqsyn dep tileımin.
«Alla Taǵalanyń meshitterin tek Allaǵa jáne aqyret kúnine ıman etken, namaz oqyǵan, zeketin bergen jáne Alladan basqa eshkimnen qoryqpaıtyndar ǵana salady», – deıdi Quranda. Eń bastysy saýapty is jasaımyn degen adamnyń nıeti Allanyń razylyǵy úshin bolýy kerek. Búgin Arys qalasynyń qaq ortasynda 6 birdeı ǵımarattyń ashylýyna kýá bolýdamyz. Árıne bilimmen qatar sport ta kerek, ortalyq bolǵan soń onyń adal ashanasy, jatyn orny túgel qamtylýy tıis. Osy oraıda árbir núktesine deıin yjdaǵattylyqpen jumys istegen barshańyzǵa Allanyń razylyǵy bolsyn! Jamaǵat pen shákirtterimizdiń ıgiligi jolynda qyzmet etsin» dedi Bas múftı.
Ashylý rásiminde sondaı-aq aýdan ákimi de sóz alyp jańa qulshylyq úıiniń qundylyǵyna toqtaldy.
Is-shara barysynda meshitke atsalysqan azamattarǵa Bas múftı atynan alǵys hat berildi. Keıin qulshylyq ornynda alǵashqy juma namazy oqylyp, meımandar meshit jáne quran jattaý ortalyǵymen tolyq tanysty. Aıta keteıik, meshit janynda ashana, erler men qyzdar quran jattaý ortalyǵy, sport zal qamtylǵan.
Derekkóz: QMDB Baspasóz qyzmeti
