Astana ákimi atynan «Áziret Sultan» meshitinde aýyzashar berildi (FOTO)

Keshe respýblıkalyq «Áziret Sultan» meshitinde Astana qalasynyń ákimi Áset Isekeshev atynan jamaǵatqa dastarhanǵa jaıylyp, tegin aýyzashar berildi. Bas meshittegi berekeli dastarhanǵa Elordamyzdaǵy turmysy tómen otbasylar men muqtaj jandar, zııaly qaýym ókilderi men aqyn-jazýshylar, jýrnalıster, el aǵalary men qoǵam qaıratkerleri qatysyp, ǵıbratty otyrysqa kýá bolyp qaıtty. Qala ákiminiń orynbasary Ermek Amanshaev myrza jıylǵan jamaǵatqa quttyqtaý lebizin bildirip, búgingi aýyzashar dastarhanyna kelgenderine rızalyǵyn jetkizdi.

Aýyzashar dastarhanyna QMDB tóraǵasynyń birinshi orynbasary, naıb múftı, respýblıkalyq «Áziret Sultan» meshitiniń bas ımamy Naýryzbaı qajy Taǵanuly da qatysyp, jıylǵan jamaǵatqa óz lebizin jetkizdi. Qasıetti Ramazan aımen quttyqtap, berekeli aıdyń qadir-qasıeti men artyqshylyǵy jaıynda aıtyp ótken Naýryzbaı qajy Taǵanulynyń ýaǵyzy jıylǵan jamaǵatqa erekshe áserin qaldyrdy. Budan bólek, elimizge belgili aqyn-jazýshylar Ákim Tarazı men Nesipbek Aıtuly da óz tilekterin bildirip, Ramazan aıynyń qadir-qasıeti týrasynda taǵylymdy oı qozǵady. Memleket jáne qoǵam qaıratkeri Ómirbek Báıgeldi aqsaqal da alqaly topqa atalyq tilegin arnap, eldiń amandyǵyn surap duǵa jasady.