ASTANA IMAMDARY PREZIDENT JOLDAÝYN TYŃDADY

Astana qalasynyń Bas ımamy Nurbek qajy Áýeshanuly bastaǵan elordanyń din qyzmetkerleri Qazaqstan Respýblıkasy Prezıdenti Qasym-Jomart Toqaevtyń Qazaqstan halqyna Joldaýyn tyńdady.

Memleket basshysy bıylǵy Joldaýdyń mańyzyna toqtalyp, Qazaqstan táýelsizdiginiń 35 jyldyǵy men jańa Konstıtýtsııanyń tarıhı mánin atap ótti. Sondaı-aq eldiń aldaǵy damý mindetteri, qoǵamdyq birlik pen kelisimdi saqtaý, talap pen tártipti nyǵaıtý máselelerin qozǵady.

Joldaýda kóterilgen «Adal azamat» ıdeologııasy, otanshyldyq, adal eńbek pen qoǵamdyq ádep sekildi qundylyqtar qoǵamnyń damýy men óskeleń urpaq tárbıesinde mańyzdy oryn alady. Bul baǵyttar azamattardyń el aldyndaǵy jaýapkershiligin arttyryp, ózara qurmet pen tatýlyqty nyǵaıtýǵa úndeıdi.

Din qyzmetkerleri Joldaýdy tyńdaý arqyly el ómirindegi mańyzdy bastamalarmen tanysty. Qoǵamdaǵy kelisimdi saqtaý, adamgershilik qundylyqtardy dáripteý jáne halyqty izgilikke shaqyrý baǵytyndaǵy rýhanı-aǵartýshylyq qyzmettiń mańyzy da aıryqsha.

Источник: Aisha