«Astana» medresesinde semınar ótti (FOTO)
Nur-Sultan qalasyndaǵy «Astana» medrese-kolledjinde «Halal – sharıǵat talaby» taqyrybynda oqý-semınary uıymdastyryldy.
«Halal Damý» dırektory Aıbek Asqarbekulynyń jetekshiligimen ótken semınarǵa medrese dırektory Baqtybaı Qydyrbaıuly, tehnolog Danııar Safıev, Aızat Sataeva jáne medrese ustazdary men shákirtteri qatysty.
Oqý-semınar barysynda sharıǵatymyzdaǵy halaldyń orny men mańyzy jóninde túsindirgen Aıbek Asqarbekuly: «Alla Taǵala adamzat balasyna kól-kósir nyǵmetter berip, jer betindegi halal men haram nárselerdiń ara jigin ajyratyp kórsetken. Adal astyń adam rýhyna, densaýlyǵyna, qulshylyǵyna tıgizer yqpaly mol. Duǵamyzdyń qabyl bolýy, denimizdiń saý, urpaǵymyzdyń ulaǵatty bolýy jegen asymyzdyń adal bolýyna tikeleı baılanysty» dep halaldyń salmaǵy men mańyzy jóninde túsindirdi.
Tehnolog mamandar halal ónim óndirý tehnologııasy men standart talaptary, «QMDB Halal» sertıfıkatynyń artyqshylyǵy men ereksheligi, zerthanalyq tekseristiń mańyzdylyǵy, taǵamdyq qospalardyń óndirisi jóninde baıandady. Sonymen qatar, qatysýshylar suraqtaryna jaýap berilip, medrese ujymy shákirtterdiń bilimin jetildirýge múmkindik bergen «Halal Damý» uıymyna alǵys bildirdi.
Semınar sońynda, medrese shákirtteri men oqý ornynyń kitaphana qoryna «Halal –sharıǵat talaby» syıǵa tartyldy.
