ASTANA MEShITTERINIŃ JYLDYQ QORYTYNDY JIYNY ÓTTI (FOTO)

Búgin Qazaqstan Respýblıkasynyń Ulttyq mýzeıinde QMDB Astana qalasy ókildiginiń jyldyq qorytyndy jıyny ótti. Qazaqstan musylmandary dinı basqarmasy jarııalaǵan 2023 – «Islam jáne izgi qoǵam» jyly Elorda meshitteriniń atqarǵan jumys esepteri tyńdalyp, qala bas ımamy Erbolat Nuryldauly úzdik qyzmetkerlerge marapat tabystady.

Qorytyndy jıyn barysynda qaladaǵy 14 meshittiń bas ımamdary QMDB bekitken jumys baǵyttary boıynsha atqarylǵan jumystar men sharalar esebin slaıd shoý arqyly baıandap, foto málimetterdi kitapsha kúıinde qala bas ımamyna tapsyrdy. Sondaı-aq, qulshylyq ordalarynyń sharýashylyq, is basqarý, qujattarmen jumys, áleýmettik jeli jáne ókildik saıttaryndaǵy belsendilik, t.b. jumystarynyń da esebi tyńdaldy.

Jıyn sońynda qala bas ımamy Erbolat Nuryldauly bıylǵy jyly qarymdy qyzmet etip, ókildik jumysyna erekshe úles qosqan dinı qyzmetkerlerdi arnaıy marapattap, yntalandyrý syılyqtaryn tabystady.

Sýretter toptamasyn «FOTOGALEREIa» aıdarynan kóre alasyzdar!