ASTANA QALASY ÓKILDIGI TÚRKIIaǴA BARǴAN QUTQARÝShYLARǴA ALǴYS AITTY (FOTO)

Búgin QMDB Astana qalasy ókildigi 1 naýryz – Alǵys aıtý kúnine oraı Tótenshe jaǵdaılar departamentiniń qyzmetkerlerine arnaıy alǵystaryn bildirdi. Dúnıejúzilik Azamattyq qorǵanys kúnine oraı Tótenshe jaǵdaılar departamentiniń E.Rahmadıev atyndaǵy fılarmonııa zalynda ótken alqaly jıynyna arnaıy qatysqan Astana qalasynyń bas ımamy Erbolat Júsipov qutqarýshylar eńbegin joǵary baǵalaıtynyn jetkizip, izgi tilegin bildirdi.

Alǵys aıtý kúnine oraı jasalǵan bul sharanyń mańyzdylyǵyn aıta kelip, Erbolat Nuryldauly Astana qalasy Tótenshe jaǵdaılar departamentiniń basshysy Bazarbaev Qýanar Bekenulyna ókildik atynan «Alǵys hat» tabystap, merekelik syılyqpen quttyqtady.

Sondaı-aq, Astana qalasynyń bas ımamy jaqynda ǵana Túrkııa memleketindegi zilzala kezinde kómekke attanǵan Jedel qutqarý jasaǵynyń 23 qyzmetkerine arnaıy alǵysyn bildirip, ókildik atynan syı-sııapat tabystady.