ASTANADA DINI OŃALTÝǴA QATYSTY SEMINAR ÓTTI (FOTO)

Múftııattyń «Jat dinı aǵymdardan saqtandyrý» baǵytynyń josparyna sáıkes Astana qalasynda «Destrýktıvti dinı aǵym jaqtastaryn ońaltý jumysyndaǵy teologııalyq, psıhologııalyq jáne áleýmettik erekshelikter» taqyrybynda eki kúndik kásibı biliktilikti arttyrý semınary ótti.

Oǵan Astana, Almaty, Shymkent jáne barlyq oblys ortalyqtarynyń dinı ońaltý jumysyna jaýapty qyzmetkerleri qatysty. Semınarda QR Prezıdenti janyndaǵy memlekettik basqarý akademııasy, memlekettik saıasattyń Ulttyq mektebi dırektory Talǵat Jaqııanov, Bas múftıdiń keńesshisi Bıjigit Qoıshıev, belgili psıholog Lola Shakımova, «Hýsamýddın as-Syǵynaqı» ıslam ınstıtýtynyń ustazy Iasır Ahmed Setohı jáne «Nur-Múbarak» EIMÝ oqytýshysy Nurjan Smaǵulov dáris oqydy.

Sonymen qatar Qazaqstan musylmandary dinı basqarmasynyń tóraǵasy Naýryzbaı qajy Taǵanuly atalmysh jıynnyń qorytyndy rásimine arnaıy qatysyp sóz sóıledi.

«Búginde sizder dinı ońaltý jumysy boıynsha jat dinı aǵym jaqtastarymen júıeli túrde jeke kezdesýler ótkizip júrsizder. Qudaıǵa shúkir, destrýktıvti dinı ıdeologııa shyrmaýynan tolyq bas tartyp jatqandar barshylyq. Bul sizderdiń qajyrly eńbekterińizdiń jemisi. Sondyqtan sizderge qarjylyq jáne materıaldyq qoldaý kórsetý bizdiń basty nazarymyzda bolady», - dedi Bas múftı.  

Is-shara sońynda QMDB Tóraǵasy semınarǵa qatysqan ońaltý jumysyna jaýapty mamandarǵa sertıfıkat tabystady.

​