ASTANADA ǴULAMALAR KEŃESINIŃ 49-ShY MÁJILISI BASTALDY

Astanada QMDB Tóraǵasy, Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasy janyndaǵy Ǵulamalar keńesiniń 49-shy májilisi bastaldy. 

Jıynda Bas múftı Ǵulamalar keńesiniń qyzmetine toqtalyp, qoǵam úshin ózekti máselelerge qatysty pátýalar men mańyzdy qujattar qabyldaýdyń jaýapkershiligin atap ótti.

«Keńes qurylǵan kúnnen bastap 48 otyrys ótti. Osy ýaqytqa deıin 63 tujyrymdamalyq qujat pen QMDB málimdemesi qabyldandy. Sharıǵat, áleýmettik máseleler, medıtsına, otbasy jáne neke sekildi taqyryptar boıynsha 181 pátýa qaraldy. Nátıjesinde bes tomdyq pátýalar jınaǵy jaryq kórdi», – dedi Naýryzbaı qajy Taǵanuly.

Májilistiń kún tártibinde birqatar mańyzdy másele qaralýda. Atap aıtqanda, «Ustazdyń tulǵalyq kelbeti» jáne «Dinı bilim berý uıymdaryndaǵy shákirt ádebi jáne rýhanı-tulǵalyq beınesi» qujattary talqylanýda.

Sonymen qatar Keńes músheleri jasandy ıntellekt, jasandy et, kebinge Quran aıattaryn jazý, moraldyq zııan úshin ótemaqy jáne banktik taýarrýqqa qatysty pátýalardy qarastyrýda.











​