ASTANADA I HALYQARALYQ QURAN JARYSY BASTALDY (FOTO)

Búgin elordada Qazaqstan musylmandary dinı basqarmasynyń tuńǵysh ret uıymdastyrýymen Qazaqstan Respýblıkasynyń ulttyq merekesi – Respýblıka kúnine oraı I halyqaralyq Quran jarysy bastaldy.

Respýblıkalyq bas meshitte ótip jatqan halyqaralyq jarys qasıetti Quran Kárim aıattaryn oqýmen ashylyp, Bas múftı Naýryzbaı qajy Taǵanuly arnaıy duǵa jasady. QMDB Tóraǵasy oqylǵan Quran saýabyn jýyrda ǵana Qaraǵandy shahtasynda qaza tapqan azamattardyń, sondaı-aq Palestınadaǵy jazyqsyz qurbandardyń rýhyna baǵyshtady. Alla Taǵaladan elge amandyq, jer betine beıbit zaman tiledi.

Budan keıin qazaq dalasyna Islam dininiń kelýi jóninde ázirlengen arnaıy beınerolık kórermen nazaryna usynyldy. Sondaı-aq Bas múftı Naýryzbaı qajy Taǵanuly alǵysóz sóılep, qatysýshylardy, qurmetti qonaqtardy quttyqtady.

«Búgin qazaq topyraǵynda Qazaqstan musylmandary dinı basqarmasynyń uıymdastyrýymen Qazaqstan Respýblıkasynyń ulttyq merekesi – Respýblıka kúnine oraı tuńǵysh ret ótkizilip otyrǵan I halyqaralyq Quran jarysynyń negizgi maqsaty – babalar amanatyna amal etý, Quran qundylyqtaryn álemdik deńgeıde dáripteý, qasıetti kitabymyzǵa qurmet kórsetý mádenıetin qalyptastyrý» dedi QMDB Tóraǵasy.

Álemniń 30-ǵa jýyq elinen 27 qarı qatysyp jatqan Quran jarysy eki kúnge jalǵasady. Jarysty qazaq tilinde QMDB Ýaǵyz-nasıhat bóliminiń meńgerýshisi Batyrjan Mansurov pen arab tilinde Qajylyq bólimi meńgerýshisiniń orynbasary Syrym Qurmash júrgizýde.

Aıta keteıik, Quran jarysy múftııattyń tól «Munara TV» telearnasynan, «Mýftııat QMDB» YouTube arnasynan, Dinı basqarmanyń @muftiyatkz resmı ınstagram-paraqshasynan tikeleı Efır arqyly kórsetilip jatyr.

​Derekkóz: QMDB Baspasóz qyzmeti