ASTANADA KELINDER SAIYSY ÓTTI (FOTO)

28 qazan 2025 1047 0 Оqý rejımi

Qazaqstan musylmandary dinı basqarmasy Astana qalasy ókildiginiń Áıel-qyzdar sektorynyń uıymdastyrýymen jáne «Ál-Farabı» meshitiniń uıytqy bolýymen ulttyq qundylyqtardy dáripteýge baǵyttalǵan «Jaqsy kelin – yrysym» atty kelinder saıysy ótti.

Bul ıgi is-sharanyń basty maqsaty – qazaq halqynyń kelinderge tán ádep-ıba, salt-dástúr men otbasylyq qundylyqtaryn jańǵyrtyp, jas býynnyń boıyna izettilik pen ınabattylyqty sińirý boldy.

Saıys tórt nomınatsııa boıynsha ótti:

Ózin-ózi tanystyrý,
Kıim kııý ádebi,
Óz ónerlerin kórsetý,
Kespe kóje pisirý.

Baıqaý barysynda qatysýshy kelinder ulttyq kıim úlgisin tanystyryp, qonaq kútý ádebi men dastarqan jaıý dástúrin kórsetti. Sonymen qatar, túrli turmystyq jáne tárbıelik suraqtarǵa jaýap berip, óz ónerlerin ortaǵa saldy.

Jarysty baǵalaǵan qazylar alqasynyń quramynda qoǵam qaıratkeri Orazkúl Asanǵazy, QMDB Áıel-qyzdar sektorynyń meńgerýshisi Dınara Nurǵalıeva, sondaı-aq Astana qalasy ókildiginiń Áıel-qyzdar sektorynyń jetekshisi Kúlsara Beket boldy.

Nátıjesinde:
1-oryndy – «Aqmeshit» meshitiniń kelini Qudaıbergenqyzy Sahıba,
2-oryndy – «Abu Nasr al-Farabi» meshitiniń kelini Jeńis Mereke,
3-oryndy – «Kóktal» meshitiniń kelini Ábdijappar Gúlnár ıelendi.

Is-shara kórermenderge erekshe rýhanı áser syılap, ulttyq bolmysty ulyqtaýdyń mán-mańyzyn taǵy bir aıqyndady. Uıymdastyrýshylardyń aıtýynsha, mundaı sharalar qoǵamda otbasylyq qundylyqtardy dáriptep, jas kelinderdiń úlgi bolarlyq beınesin qalyptastyrýǵa baǵyttalǵan.

Saıys sońynda úzdik óner kórsetken qatysýshylarǵa Alǵys hattar men baǵaly syılyqtar tabys etildi.