ASTANADA «ULY DALADAǴY ÝAQYPTYŃ ORNY» II RESPÝBLIKALYQ FORÝMY ÓTÝDE
Astanada Qazaqstan musylmandary dinı basqarmasyna qarasty «Ýaqyp» korporavtıvtik qaıyrymdylyq qorynyń uıymdastyrýymen «Uly daladaǵy ýaqyptyń orny» atty II respýblıkalyq forým ótýde.
Saltanatty sharaǵa Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly qatysyp, kópshilikke ýaqyptyń mán-mańyzy týraly baıandama jasady.
«Islam órkenıetiniń eń kóne ári mańyzdy áleýmettik ınstıtýttarynyń biri – ýaqyp. Ol – musylman qoǵamynda áleýmettik ádilettik ornatýǵa, bilim men ǵylymdy órkendetýge, muqtajdardy qoldaýǵa baǵyttalǵan qaıyrymdylyq júıesi.
Ýaqyp – belgili bir múlikti Alla razylyǵy úshin Onyń jolyna arnap, negizgi qoryn saqtaı otyryp, odan túsetin paıdany qoǵam ıgiligine turaqty túrde jumsaý. Bul – ǵasyrlar boıy musylman qoǵamynyń damýyna, bilim, mádenıet, densaýlyq jáne qaıyrymdylyq salalarynyń órkendeýine orasan zor úles qosqan ári qosyp kele jatqan rýhanı ári áleýmettik júıe. Bul sadaqadan da keń uǵymdy qamtıdy. Sebebi ýaqypta múlik joıylmaıdy, onyń paıdasy úzilmeıdi.
Qazirgi tańda elimizde de ýaqyp mádenıeti qaıta jandanyp keledi. Allaǵa shúkir, qoǵamda ýaqypty jaqsy túsinetin jandardyń sany kún sanap artýda. Qazaqstan musylmandary dinı basqarmasy janynan Ýaqyp qory qurylyp, medreselerdiń qyzmeti jandanyp, áleýmettik jobalar, muqtaj otbasylarǵa kómek osy júıe arqyly júzege asýda», - dedi Bas múftı.
Aıta keteıik, búgingi forýmda QMDB Ǵulamalar keńesiniń músheleri Arman Qýanyshbaev pen Ersin Ámire, “Islam qarjysy” sektorynyń meńgerýshisi Nurjan Stambakıev, Neıropsıholog Ábdirashıt Túlkibaı, «Ýaqyp» qaıyrymdylyq qorynyń dırektory Azamat Ábdikerimuly túrli taqyrypta baıandama jasaıdy.
