Elbasy Astanadaǵy Bas meshittiń kapsýlasyn qalady (FOTO+VIDEO)

Astananyń sol jaǵalaýynda jańa meshit boı kóteretin bolmaq. Aıtýly qulshylyq ordasynyń kapsýlasyn qalaýǵa búgin Prezıdent Nursultan Nazarbaev ózi qatysty.

«Meshittiń negizgi ǵımaratyn salyp jatyrmyz, ol bizdiń aımaǵymyzdaǵy eń úlken meshit bolady. Musylman áleminde bul jaı ǵana dinı ǵımarat emes, ol qonaqtar, týrıster keletin Elordamyz úshin ásemdik turǵyda mańyzdy nysan sanalady. Biz buǵan deıin salynǵan jáne qazir salynyp jatqan meshitterdi zerttedik. Eń jaqsy jobalardy tańdadyq. Jobany ózim qaraımyn, bul nysannyń qurylysyn basynan aıaǵyna deıin ózim baqylaımyn. Keıin bárimiz jınalyp, ony ashamyz», - dedi Elbasy meshittiń irgetasyna kapsýla qalaý rásiminde.

Meshit EXPO-2017 aımaǵynda, Qabanbaı batyr men Máńgilik el dańǵyldarynyń ortasyna salynady. Onyń syıymdylyǵy - 30 myń adam, bul elimizdegi jáne Orta Azııadaǵy eń úlken meshit bolady.

Jańa meshittiń aýmaǵy - 9,4 gektar. Ǵımarattyń jalpy aýmaǵy 57 myń sharshy metr bolmaq. Meshit munarasynyń bıiktigi 130 metr, al negizgi kúmbezdiń bıiktigi 88,2 metr bolady dep josparlanyp otyr. Erlerge arnalǵan ǵıbadat zalyna bir ýaqytta 15 myń adam syıyp ketedi, al áıelderdiń ǵıbadat zaly 3 myń adamdyq bolady. Aýlaǵa taǵy 12 myń adam syıady. Qazir Qazaqstanda «Áziret Sultan» meshiti eń úlken meshit sanalady.

Ol Astananyń oń jaǵalaýynda ornalasqan, onyń syıymdylyǵy - 10 myń adam. «Áziret Sultannyń» búkil aýmaǵy 11 gektardan asady. Al ǵımarattyń aýmaǵy - 17 700 sharshy metr. Qazir qurylys orny bos jatyr.

Bul jerden «Nur Álem» sferasy, artynan «Abý-Dabı Plaza» qurylysy kórinedi.  Astananyń basty josparynda jańa meshittiń orny mynadaı:

Meshitti túrkııalyq qurylys kompanııasy salady.