Atyraýda teris dinı aǵym ókilderi sheteldikten aqsha bopsalaǵan
Atyraýda shetel azamatynan 500 myń teńge bopsalaǵan teris dinı aǵym ókilderi ustaldy, dep habarlaıdy QazAqparat.
Oblystyq Polıtsııa departamenti baspasóz qyzmetiniń aqparatyna qaraǵanda, qalanyń eki turǵyny 24 tamyzda Ózbekstan Respýblıkasynyń azamatyna kúsh qoldanyp, 500 myń teńge aqsha talap etken.
«Shetel azamaty kúsh kórsetýshilerdiń qolynan bosap shyqqan boıda polıtsııa qyzmetkerlerine aryzdanǵan. Polıtseıler Ulttyq qaýipsizdik komıteti departamentiniń qyzmetkerlerimen birlese júrgizgen jedel-izdestirý sharasy kezinde Atyraý qalasynyń 37 jáne Jylyoı aýdanynyń 41 jastaǵy turǵynyn ustady. Olardan aıǵaqzat retinde Ózbekstannyń 44 jastaǵy azamatynan bopsalap alǵan aqsha tárkilendi. Ustalǵandardyń biri – buryn birneshe ret sottalǵan Jylyoı aýdanynyń turǵyny ýaqytsha ustaý ızolıatoryna qamaldy. Al ekinshi kúdikti úıqamaqqa alyndy», - dep habarlady departamenttiń baspasóz qyzmetinen.
Qazir ustalǵan ekeýge qatysty QR Qylmystyq kodeksiniń «bopsalaý» babymen sotqa deıingi tergeý júrgizilýde. Alǵashqy tergeý barysynda eki kúdiktiniń destrýktıvti dinı aǵymdy ustanýshylar ekeni anyqtaldy. Eske sala ketelik, buǵan deıin Atyraýda áıelden 150 myń teńge bopsalaǵan turǵyn ustalǵan edi.
