ÁIEL-QYZDAR sektory «aýyzashar bokstaryn» taratty
QMDB Áıel-qyzdar sektorynyń uıymdastyrýymen elorda turǵyndaryna «Aýyzashar bokstary» taratyldy.
Sektor meńgerýshisi Dınara Nurǵalıevanyń aıtýynsha demeýshilerdiń qoldaýymen bas qalanyń adam kóp júretin oıyn-saýyq ortalyqtary men saýda oryndary mańaıynda 80 adamǵa aýyzashar boksy berildi.
«Negizinen aýyzashar boksyn taratý karantın kezinde óte ózekti bolǵan edi. Allaǵa shúkir bıyl aýyzasharlar meshitterde, tamaqtaný oryndarynda berilip jatyr. Dese de, jumystan, oqýdan úıine qaıtyp bara jatqan turǵyndarǵa qýanysh syılaý maqsatynda osy ıgi isti qolǵa aldyq. Oraza ustaýshy turǵyndarǵa nıetteri qabyl bolsyn degen tilegimiz bar. Atalmysh ıgi is Ramazan aıynyń sońyna deıin taǵy da uıymdastyrylady» deıdi Dınara Qutqojaqyzy.
