«ÁZIRET SULTAN» MEShITINDE OQYRMANDAR KLÝBY AShYLDY (FOTO)
Astana qalasynyń Bas ımamy Erbolat Júsipovtiń bastamasymen elordadaǵy «Áziret Sultan» meshitinde «Áziret» oqyrmandar klýby ashyldy.
Klýbtyń ashylý saltanatyna Astana qalasynyń Bas ımamy Erbolat Nuryldauly bastaǵan elordada ımamdary men QMDB Sharıǵat jáne pátýa bóliminiń meńgerýshisi Sansyzbaı Qurbanuly jáne klýb músheleri qatysty.
Maqsat – kitap oqý mádenıetin qalyptastyrý, jamaǵattyń oı-órisin keńeıtip, rýhanı damýyna úles qosý. Sondaı-aq, «Bir aıda bir kitap» jobasy arqyly eki apta saıyn belgili bir tańdalǵan týyndylardy oqyp shyǵyp, oqyrmandarmen birge onyń mazmunyn talqylaý.
Alǵashqy otyrysta qatysýshylar Baýyrjan Momyshulynyń «Ushqan uıa» shyǵarmasyn talqylap, týyndydaǵy tárbıe men otbasylyq qundylyqtar jóninde oı bólisti sondaı-aq kitap oqýdyń mańyzdylyǵy, ýaqytty tıimdi paıdalaný, rýhanı jáne zııatkerlik damýdyń joldary týraly pikirler aıtyldy.
Bas ımam Erbolat Júsipov klýbtyń ashylý maqsatymen tanystyryp: «Bul klýb – jamaǵattyń rýhanı ómirin baıytyp, paıdaly ári mazmundy orta qalyptastyrýdy kózdeıdi. Kitap – adamnyń oılaý qabiletin jetildiretin eń qundy qural», – dep atap ótti.
Jıyn sońynda qatysýshylarǵa «Kitap oqýdyń 7 paıdasy» atty tanymdyq paraqshalar taratylyp, aqsaqaldar izgi tilek pen batasyn berdi.
Источник: Aidos
