«ÁZIRET SULTAN» MEShITINDE JUMYSShY MAMANDYQ IELERIMEN RÝHANI KEZDESÝ ÓTTI (FOTO)
«Jumysshy mamandyqtar jylyna» oraı elordadaǵy «Áziret Sultan» meshitinde túrli salada eńbek etip júrgen jumysshylarmen «Adal eńbek etkeniń – Alla jolynda júrgeniń» taqyrybynda rýhanı kezdesý ótti.
Aq dastarhan basyndaǵy jıynda meshittiń naıb ımamy Abdýlahad Smanov adal eńbektiń ıslamdaǵy orny men mán-mańyzy týraly ýaǵyz-nasıhat aıtyp, Paıǵambarymyz Muhammedtiń (s.ǵ.s.) eńbekti dáriptegen hadısterinen mysaldar keltirdi. Adal eńbek – adamnyń óz nápsisin tárbıelep, qoǵamǵa paıda ákelýine jol ashatyn izgi amal ekenin. Kim óz eńbegimen tabys tapsa, sol adam Alla razylyǵyna jaqyndaıtynyn atap ótti.
Qazaq halqynda da adal eńbekke erekshe mán berilgen. «Eńbek etseń erinbeı, toıady qarnyń tilenbeı», «Adal eńbektiń nany tátti» degen danalyq sózder halyqtyń eńbekke degen qurmetin kórsetedi. Ata-babamyz mal baǵyp, jer jyrtyp, kásibin dinmen ushtastyra otyryp, mańdaı terimen tapqan tabysty eń qasıetti rızyq dep sanaǵan. Sol sebepti adal eńbek – tek kúnkóris kózi emes, rýhanı tazarýdyń da bir joly retinde baǵalanǵan.
