«Áziret Sultan» meshitindegi jazǵy saýat ashý kýrsy bastaldy (FOTO)
Búgin Astana qalasyndaǵy respýblıkalyq «Áziret Sultan» meshitinde jazǵy saýat ashý kýrsy óz jumysyn bastady. 7 men 15 jas aralyǵyndaǵy 300 oqýshy endi úsh apta boıy elimizdiń Bas meshitinde dinı saýat jetildirip, jazǵy demalystaryn paıdaly ótkizetin bolady. Osy oraıda meshit ustazdarynyń májilisinde bekitilgen oqý josparyna sáıkes ótkiziletin Quran álippesi men Imandylyq álippesi, Ádep jáne Duǵa sabaqtary búldirshinderdiń dinı bilim alyp qana qoımaı, tárbıe men ádeptilikti boıyna sińirip shyǵýyna septigin tıgizetin bolmaq.
«Imanı jaz» dep atalatyn bul ıgi sharanyń bastalýyna oraı búgin arnaıy ashylý saltanaty bolyp ótti. Shara aıasynda «Áziret Sultan» meshitiniń naıb ımamy Baqytjan Ótkelbaev quttyqtaý lebizin bildirip, búldirshinderge sáttilik tiledi. Al, Bas meshittegi oqý-aǵartý jumystaryna jaýapty naıb ımam Qanat Qydyrmın ata-analar men oqýshylarǵa bıylǵy jazǵy saýat ashý kýrsynyń erekshelikteri jaıly túsindirip ótti. QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımam Naýryzbaı qajy Taǵanulynyń bastamasymen bıylǵy jyly jazǵy lagerge qabyldanatyn balalar sany kóbeıip, sondaı-aq arnaıy oqý erejesi men baǵdarlamasy bekitilip otyr. Buǵan qosa, jastar úshin jadynama jasalyp, bilim berý júıesiniń jańa deńgeıin qalyptastyrýǵa kúsh salynýda.
Úsh aptaǵa sozylatyn «Imanı jaz» aıasynda oqýshylar arasynda túrli bilim jarystary men sýret saıystaryn uıymdastyrý da josparlanyp otyr. Oqýshylardyń boıyna otansúıgishtik qasıetti sińirip, tanym kókjıegin keńeıte túsý maqsatynda Elordamyzdaǵy mádenı oryndarǵa arnaıy saıahat jasaý da josparǵa engizilgen. Balalardy yntalandyrý úshin oqý baǵdarlamasy boıy arnaıy juldyzshalar taratalyp, sońynda kóp juldyzsha jınaǵan úzdikterge júldeli syılyqtar tabystalatyn bolmaq. Bir sózben aıtqanda, Respýblıkalyq «Áziret Sultan» meshitinde qasıetti Ramazan aıyna dóp kelgen «Imanı jaz» jazǵy saýat ashý kýrsyn búldirshinderimiz úshin barynsha paıdaly ótkizýge jan-jaqty jaǵdaı jasalyp otyr.
