«Áziret Sultan» meshitiniń eriktiler toby naýqas balalarǵa syılyq jasady (FOTO+VIDEO)
Respýblıkalyq «Áziret Sultan» meshitiniń shákirtterinen quralǵan «Meıirim júregi» atty eriktiler toby keshe Nur-Sultan qalasy ákimdiginiń «Nurly júrek» áleýmettik qyzmet kórsetý ortalyǵyndaǵy» (KMM) naýqas balalardy zııarat etip, kishigirim mereke uıymdastyryp qaıtty. Qasıetti juma kúni súnnet jańǵyrtqan eriktiler tobymen birge Muslim.kz portalynyń qyzmetkerleri de ıgi sharaǵa atsalysyp, baldyrǵandarǵa qýanysh syılady.
Top músheleriniń birigýimen ortalyqtaǵy balalarǵa syılyqtar taratylyp, tátti taǵamdar men jemister berildi. Ortalyqqa qajetti jaıalyqtar men sýly maılyqtar qoryn tabystady. Bárinen buryn baýyrmal júrektiń meıirimine zárý baldyrǵandar úshin ózderin arnaıy zııarat etip kelgen aǵa-ápkeleriniń appaq peıilderi artyq bolǵandaı. Ár balamen jekeleı tanysyp, baýyryna basqan top músheleriniń ystyq sezimderi ortalyqtyń aıadaı akt zalyn merekelik kúıge toltyrdy. Osylaısha, ortalyqtaǵy kezdesý balalardyń baqytty kúlkisine toly ótip, keterlerinde qımaı qoshtasty. Az ǵana ýaqyttyń ishinde aǵa-ápkelerine baýyr basyp úlgergen balalardyń «endi qashan kelesizder?» degen sózi – «Meıirim júregi» eriktiler tobynyń aı saıyn osy ortalyqqa kelip, qaıyrymdylyq sharasyn ótkizip turýǵa ýaǵdalasýyna jol ashty.
Qasıetti juma kúni qaıyrymdylyq sharasyn mazdatqan «Meıirim júregi» eriktiler tobynyń qurylǵanyna da kóp bolmaǵan. QMDB tóraǵasynyń birinshi orynbasary, naıb múftı Naýryzbaı qajy Taǵanuly Ramazan aıy kezinde Bas meshitte qaıyrymdylyq sharalarynyń qataryn kóbeıte túsýge bastama kótergen bolatyn. Jaqsylyqta jarysýǵa úndegen ımam ýaǵyzyna amal etken shákirtter arasynda osylaısha boı kótergen «Meıirim júregi» eriktiler toby buǵan deıin meshitte ótken túrli sharalarǵa da óz úlesterin qosyp úlgergen.
Sýretterdi «FOTOGALEREIa» aıdarynan kóre alasyzdar!
